Sonia Gandhi
El Vikipedio
Barato > Politiko de Barato > Familio Gandhi
Sonia GANDHI ([sonja gandhi] naskita je la 9-a de decembro, 1946), estas barata politikistino, nun prezidantino de partio Barata Nacia Kongreso. Ŝia partio venkis en ĝenerala balotado jare 2004, sed ŝi rifuzis esti ĉefministrino de Barato.
Ŝi naskiĝis kiel itala Sonia Majno en Orbassano (8 km de Torino, Italio), studis en Universitato de Kembriĝo, kie ŝi konatiĝis kun aviadpiloto Raĝiv Gandhi, filo de Indira Gandhi, kaj poste edziniĝis al li en 1968, poste ŝi translokiĝis al Barato. Ŝi surprenis la baratan regnanecon nur en 1983, post 15 jaroj de la geedzeco kun Raĝiv.
Kiel ŝia edzo antaŭe, ŝi ne intencis partopreni en politiko, sed post murdado de ŝia edzo la 21-an de majo 1991 la Kongresa partio faris premon al ŝi por partopreni en la politiko, plidaŭrigi la dinastian tradicion de la Kongresa Partio. La partio estis tiom dividita, ke nur Gandhi-ano (eĉ fremda) povus esti akceptita de ĉiu partiero.
En la jaro 1998 ŝi formale alpaŝis la politikon, la Kongresa Partio kandidatis ŝin por la posteno de ĉefministro. Ŝin helpis en la balotado 2004 la konata Gandhi-nomo, sed la tiam gvidanta partio (Barata Popola Partio) konstante ekspluatis la faktojn, ke ŝi ne naskiĝis en Barato kaj, ke, kvankam flue, parolas la hindian lingvon kun akĉento.
Ŝi parolas angle kaj hindie, kaj rifuzas paroli la italan eĉ al italaj ĵurnalistoj.
Ŝia filo Rahul Gandhi estis elektita kiel parlamentano en 2004 kaj ŝia filino Prijanka Gandhi estis ŝia kampanja manaĝero.
