Wörpel (Speel)
From Wikipedia
Een Wörpel to'n Spelen (ok Tardel oder Knobel) is een Saak, de hensmeten warrt un denn up een waagrecht Fläch to liggen kümmt. Jümmers gifft dat verscheden Möglichkeiten, wie een Wörpel fallt un liggen blifft. In veel Spelen warrt de Wörpel bruukt, dormit de Tofall sien Hand in't Speel hett. Dormit dat ok klappt, is up de (meist seß) Babensieden vun een Wörpel jümmers een Teken to sehn. Nadem de Wörpel hensmeten is, liggt een vun düsse Tekens in een besunner Laag un wiest, wat bi dat Hensmieten rutkamen is.
Mit Afstand an'n meisten gifft dat den Wörpel mit seß Kanten un de Tallen (ok as Punkten) 1-6 dor up tekent. Düsse Punkten warrt ok Ogen nömmt. Normalerwies meent de Lüde düsse Aart vun Wörpel, wenn se vun een Wörpel snacken doot. Ok för de geometrisch Form is düsse Naam öbernahmen wurrn. Man dat gifft ok allerhand anner Wörpels.
[Ännern] Allgemeen Egenschoppen
Dormit würklich de Tofall sien Hand in't Speel hebben kann, scholl dat bi de verscheeden Möglichkeiten vun een Wörpel jümmers de glieke Chance geven. Wenn dat bi een Wörpel so is, denn warrt he ideaal Wörpel nömmt.
Een Wörpel schall goot rullen, man nich to lang. Un wenn he liggen deit, schall he fast liggen. Vunwegen düsse Eegenschuppen warrt an de Wörpels ok rumdoktert un dor kaamt rund Ecken an un so wat vun de Aart.
Wenn een mit een Wörpel schummeln will, denn geiht he bi un fummelt an den Wörpel rüm. Man nümms schall dat sehn. Dor warrt denn vun een tinnten Wörpel snackt. De schall denn so fallen, dat een mehr Chancen hett to'n Winnen. Dormit dat nich so eenfach is, de Wörpels to tinnen, weert in Casinos Wörpels bruukt, dör de een dörkieken kann.
