Psalter vun Genf
From Wikipedia
De Psalter vun Genf is een Reeg vun Gesangböker mit den Text vun de Psalmen ut de Bibel in Riemels, toeerst in franzöösche Spraak.
Johannes Calvin hett in Straßburg dat Singen vun Psalmleder kennen lehrt. 1539 hett he dor denn een Utwahl rutgeven. De weern vun Clément Marot un vun em süms torechtmaakt. 1542, 1543, un 1551 sünd nee Utgaven rutkamen. De weeren denn jümmers een beten grötter. Later hett Calvin siene eegen Riemels torüchnahmen un hett Marot de Texten maken laten. As düsse Dichter 1544 dootbleven is, hett in dat Jahr 1548 Théodore de Bèze sien Arbeit övernahmen.
In Genf hett toeerst Guillaume Franc de Musik komponeert. He weer bi de Utgaven vun 1542 un 1543 tostännig. Dormals güng dat üm een Utwahl vun 50 Psalmen. 1551 sünd al 83 Psalmen rutkamen. De Texten hett Bèze maakt, de Musik keem dütmal vun Loys Bourgeois. Een kumplett Gesangbook mit all 150 Psalmen is denn in dat Jahr 1562 rutkamen. De Musik, de noch fehlen dö, hett Pierre Davantès bistüürt.
Claude Goudimel hett de Melodien vun den Genfer Psalter up eenfache Aart för Chören torecht maakt. In de reformeerten Kuntreien vun Europa hefft sik Komponisten as Jan Pieterszoon Sweelinck un Anthoni van Noordt mit düsse Melodien ut'neen sett un allerhand dorto schreven.
In de düütsche Spraak is de Genfer Psalter to 'n eersten Mal 1573 översett wurrn. De Dichter weer Ambrosius Lobwasser. Sien Psalter weer dat Gesangbook vun de reformeerten Karken, de düütsch snacken döen. Eerst 1798 is dat aflööst wurrn vun de neen Riemels vun Matthias Jorissen. Hüdigendags gifft dat een nee Utgaav mit Riemels vun verscheeden Dichters.
[Ännern] Böker
- Dor kummt een Schipp, Plattdüütsch Gesangbook, Harmsborg 1991, ISBN 3-87546-066-9 (seß Psalmen ut den Genfer Psalter in Oostfreesche Taal sünd dor mank)
- Der Psalter,Gütersloh , 1997 (De Psalter vun Genf in nee hoochdütsche Riemels) ISBN 3-579-00049-7
- Pierre Pidoux, Le Psautier Huguenot, Vol.I/II, Basel, 1962
