Brüch vun Millau
From Wikipedia
De Brüch vun Millau (franzöösch Viaduc de Millau) is ene Brüch in Frankriek. Se wörr an’n 14. Dezember 2004 vun’n franzööschen Präsident Jacques Chirac un annere inwieht. Se is de hööchste Stratenbrüch un de längste Schraagreepbrüch op de Welt.
Inholtsverteken |
[Ännern] Laag
De Brüch is Deel vun de A 75 vun Paris na Barcelona op den Afsnitt vun Clermont-Ferrand na Béziers in de Neeg vun de franzöösche Stadt Millau. Se överspannt dat Daal vun den Tarn. In de Urlaubstiet weer dat Daal vun’n Tarn jümmer en Nadelöhr, in dat sik de Verkehr stauen dei.
[Ännern] Planen
Mehr as 20 Johren weren bruukt de verschedenen Streken to planen, dat Terrain to sonderen etc. Dat technische Konzept vun de Brüch stammt vun’n franzööschen Boinschenöör Michel Virolgeux. Dat Gestalten vun de Brüch, besünners bi de na baven to en V apenten Pielers, gaht op den britischen Arkitekten Sir Norman Foster trüch. He harr dormit den internatschonalen Arkitektenwettstriet 1996 wunnen. De Arbeiden an de Brüch hebbt in’n Oktober 2001 anfungen.
[Ännern] Bo
Den Bo hett de Firmengrupp Eiffage, de vun Gustave Eiffel grünnte Firma, utföhrt. Eiffage hett de rund 400 Millionen Euro för den Bo övernahmen un hett dorför för 75 Johren de Tollkonzeschoon för de Brüch kregen. Na disse Tiet geiht de Brüch in Staatsbesitt över. För den Bo hebbt se speziell Stahlgroffblick bruukt, dat vun dat Dillinger Iesenwark in’t Saarland maakt worrn is.
[Ännern] Technische Daten
De Brüch is 2.460 Meter lang un an den hööchsten Punkt liggt de Fohrbahn in ene Hööch vun 245 Meter. De Afstand vun de Pielers liggt bi 204 bet 342 Meter. Mit ene Hööch vun bet to 343 Meter sünd de Pielers vun de Brüch de bet dorhen hööchsten op de Welt. Al mit de söven Betonpielers sünd 85.000 m³ Beton verboot worrn. Alltohoop sünd 205.000 Tünnen Beton bruukt worrn. De ganze Streek hett en Fall vun dree Perzent. Wegen ehr exponeerte Laag is de Brüch för Wind bet 250 km/h utleggt. Bi en Belasttest in’n November 2004 föhren 28 mit Kies beladene Lasters mit en Gewicht vun tohoop mehr as 900 Tünnen över de Brüch, de sik exakt so as utreekt üm 60 Zentimeter dörbagen hett.
Dat Bowark kost 400 Millionen Euro un 2,2 Millionen Arbeidsstünnen.
[Ännern] Weblenken
- Websteed vun de Brüch (franzöösch, engelsch)
Koordinaten: 44° 5′ 6″ N, 3° 1′ 24″ O
