Внатрешно Македонска Револуционерна Организација

Од Википедија, слободна енциклопедија

ВМРО пренасочува овде. За друго значење видете ВМРО (појаснување).

Внатрешно Македонската Револуционерна Организација (ВМРО) или Внатрешна Македоно-Одринска Револуционерна Организација (ВМОРО) е македоно-одринска револуционерна организација која се борела за ослободување на Македонија и Одринско од турска власт.

Основана е на 5 ноември 1893 година (23 октомври 1893 година според стариот календар) во куќата на солунскиот книжар Иван Хаџи Николов во Солун. На тој состанок се собраа шестмина млади мажи кои ги поставуваат основите на Организацијата: Д-р Христо Татарчев – лекар, родум од Ресен, Даме Груев – учител, родум од с. Смилево - Битолско, Петар Поп Арсов – учител, родум од с. Богомила - Велешко, Иван Хаџи Николов – книжар во Солун, родум од Кукуш, Антон Димитров – учител, родум од с. Ајватово - Солунско и Христо Батанџиев – учител, родум од с. Гуменџе, Ениџе Вардарско. Тие основаат конспиративна група, нарекувајќи ја Македонски револуционерен комитет.