Hendrik III van Gelder
Van Wikipedia
- Dit artikel is gesjreve in 't Moferts. 't Weurt gewaardeerd óm in dit artikel 't Moferts aan te haje.
Hendrik III van Gelder waas de jóngste zoon van Gerard III van Gelder. Waarsjienlik is d'r in 1226 in Kloeaster Kamp gebaore. Hae kwoom in de loup vanne dertieënde ieëw in `t bezit van inkele Gelderse gebiede. Dees gebiede waerdje de Hieërlikheid Mofert. Róndj `t jaor 1260 boewdje d'r `t Kestieël Mofert. Hae waas van 1247 toet 1274 prins-bisjop van Luuk. Hae waerdje namelik door Paus Gregorius X 'onieërvol' ontslage omdet 'r zich neet bisjopswaerdig gedroog. Hendrik woor dao neet blie mit, want op dees meneer leep d'r inkómste mis. Hae troch doaróm dökker mit e legerke door 't landj van Luuk óm te klauwe. Op e gegaeve moment hawwe de Luukenieëre dao genog van, en verklaordje 'm in 1277 'vogelvrie'. Det woor doe zien raeje om e testament op te stèlle.
In 1284 leep Hendrik mit zie leger bie Franchimont inne val. Hae kós nag net wegkómme, mer de Luukenieëre zote 'm achternao. Veur det 'r op 't Kestieël kós komme, waerdje d'r door zien achtervolgers tusse Lin en Mofert mit 'ne knots ziene kiebes ingehauwe. Biej aajer luuj stuit dao landjboewgrondj bekindj es "Prinske-zie-Graaf", verneump nao dit veurval.
Wie d'r doead woor èrfdje ziene naef Reinoud I van Gelder de Hieërlikheid Mofert.
[bewirk] Prins-bisjop van Luuk
Wie in 1246 de prins-bössjop van Luuk storf, waerdje door Otto II van Gelder alles in `t wèrk gestèldj óm Hendrik bisjop te make van dit mechtige Prinsbisdom. De Luukse bevolking waas hie totaal neet van gedeendj. Doordet Otto auch in Roeame väöl invloed haw, waerdje Hendrik toch nag op 10 oktoeaber 1247 gekaoze toet bisjop van Luuk. Pas in 1258 waerdje d'r toet priester gewiedj. Hendrik steit zeker neet bekindj es `ne vrome priester. In Luuk leet d'r zich neet dök zeen, want hae goof de veurkeur aan oorlog veure. Hae stóng bekindj es `ne 'vrouwen-schender' en hae sjientj waal 61 kinjer gehadj te höbbe.
