Georges Wagner
Vu Wikipedia, der fräier Enzyklopedie.
De Georges Wagner, gebuer 1939, ass zënter 1971 den Dirigent vun der Harmonie Municipale Esch-sur-Alzette.
De Schëfflenger huet a sengem Jonktem am Lycée Technique Esch-sur-Alzette de Beruff vum Schlesser geléiert, mee ass duerno fir zerguttst un der Musek hänkebliwwen. Den Escher Conservatoire huet e mat grousser Distinctioun am Solfège an op der Gei ofgeschloss. En éischte Präis an der Harmonie an de Perfektionnementspräis op der Klarinett hunn em d'Dieren opgemaach fir den Nanzeger Musekconservatoire, wou en dann och den éischte Präis mat grousser Distinctioun op der Klarinett krut. Hien huet de Programm vu véier Joren an engem Joer fäerdegbruecht.
1960 ass de Georges Wagner dunn an d'Beruffsliewen agetratt, an zwar als Klarinettist an der Militärmusek. Do huet e sech séier profiléiert a war schlussendlech 10 Joer laang e Sous-Dirigent vun der Militärmusek.
Vun 1961 bis 1971 war hien Renfort permanent vum RTL-Orchester.
Vun 1960 bis 1971 war de Georges Wagner Dirigent vun de Mandolinne-Veräiner vun Esch-Uelzecht a Keel, vun der Harmonie de Clemency a vun der Eisenbunner- a Lampertsbierger Musek. Zënter 10 Joer ass en och Dirigent vum Ochestre Symphonique "Le Cercle" vu Rëmeleng.
De Georges Wagner huet sech och en Nummm als Komponist gemach. Hien arrangéiert ganz vill simphonesch Musek fir d'Harmonie. Hie war den éischten am Land dee schonn 1968 den Harmonieorchester mat engem Sträichorchester, groussem Chouer a Solisten zesummebruecht huet an d'Carmina Burana opgeféiert huet. Zweemol am Joer féiert hie mat der Stadmusek Galaconcerten op am Escher Theater. Déi hunn esou Succès datt all Concert un dräi Deeg gespillt gëtt. D'Harmonie fiert mat hire Concerten no der Presidence vun der Europäescher Unioun: "Hommage au ..."
