Dioskuren

Vu Wikipedia, der fräier Enzyklopedie.

D'Dioskuren (gr. Dios kouroi, Jonge vum Zeus) waren d'Zwillingsbridder Kastor a Polydeukes (lat. Castor a Pollux). Si waren d'Kanner vum Leda. Dem Kastor säi Papp soll dem Leda säi Mann Tyndareos gewiescht sinn, an dem Polydeukes säin den Zeus, deen duerfir och onstierflech war. Hier Schwëstere waren d'Helena an d'Klytaimestra.

[Änneren] Mythos

D'Dioskuren hunn D'Helena aus der Hand vum Theseus befreit, hunn um Zuch vun den Argonauten deelgeholl (wou dePolydeukes de Kampf mam risege Bebrykekinnek Amykos gewonn huet), den Herakles begleet wéi e géint d'Amazonen gezunn ass a ware bei der Kalydonescher Juegd derbäi.

D'Zwillingen haten enges Daags zesumme mat hiere Cousinen Idas a Lynkeus an Arkadien eng Rannerhäerd gestuel an si hu beschloss se ënnerteneen opzedeelen. Den Idas sollt sech dorëm këmmeren, huet sech awer en Trick afale gelooss. Hien huet ee vun de Stéieren a véier gedeelt a gesot deen deen säin Deel fir d'éischt opgiess hätt géif d'Halschend vun der Häerd kréien, an deen zweeten déi aner Halschend. Den Idas hat säi Stéck séier giess, an huet duerno sengem Brudder gehollef mat deem sengem Deel. D'Dioskuren, déi esou em hieren Deel bedru gi waren sinn a Messenien agebrach an hunn d'Duechtere vum Leukippos, déi mam Idas a mam Lynkeus verlobt waren, entfouert. Doropshinn huet den Idas de Kastor erschloen an de Polydeukes de Lynkeus. Den Zeus huet dunn den Idas mat engem vu senge Blëtzer erschloen. Well d'Bridder esou enk matenee verbonne waren, huet den Zeus hinnen erlaabt fir zesummenzebleiwen, an zwar jeweils een Dag am Olympos an een Dag an der Ënnerwelt, den Hades. Sou konnt de Polydeukes seng Onstierflechkeet mam stierfleche Kastor deelen.

[Änneren] Kult

De Kult vun den Dioskuren huet sech iwwer ganz Griichenland an Italien verbreet. A Roum sinn si an engem Tempel um Forum Romanum veréiert ginn, woubäi am Mëttelpunkt d'Legend stoung datt d'Bridder de Réimer 499 v.Chr. an der Schluecht mat de Latiner um Regillus-Séi Waffenhëllef geleescht an d'Nooriicht vun der Victoire selwer op Roum bruecht hätten.

D'Dioskure si besonnesch vu Matrouse veréiert ginn, deenen se als Konstellatioun "Zwilling" de Wee gewisen hunn an si sinn och ëm Hellef a Noutsituatiounen ugeruff ginn. Als Symbol fir de Wiessel tëscht Liewen an Doud sinn d'Dioskuren och op Grafsteng ze fanne gewiescht, dat nach bis a fréichrëschtlech Zäit.