Wright-bræður
Úr Wikipediu, frjálsa alfræðiritinu
Wright-bræður, Orville Wright (19. ágúst 1871 – 30. janúar 1948) og Wilbur Wright (16. apríl 1867 – 30. maí 1912), eru þeir menn sem venjulega eru taldir hafa orðið fyrstir til að takast að fljúga í flugvél.
Upphaflega ráku þeir saman reiðhjólaverkstæði og reiðhjólaframleiðslu en fengu áhuga á að smíða flugvél þegar þeir sáu myndir af svifdrekum Þjóðverjans Otto Lilienthal. Wright-bræður byggðu vindgöng til að rannsaka samband loftþrýstings og vænglags og prófuðu þannig ýmsar gerðir af vængjum. Fyrstu tilraunir sínar gerðu þeir eftir aldamótin 1900 með ómönnuðum tvívængja svifdrekum sem þeir létu fljúga eins og flugdreka í Kitty Hawk í Norður-Karólínu.
Árið 1903 smíðuðu þeir Flyer 1 með sérsmíðaðri vél og skrúfu að aftan og 17. desember sama ár flaug Orville það sem talið er fyrsta raunverulega flugið með flugvél á Flyer 1 39 metra í tólf sekúndur. Mörg vitni voru að fluginu, auk þess sem það náðist á frægri ljósmynd. Flugið vakti þó litla athygli og þar sem Wright-bræður neituðu að sýna flugvélina opinberlega, af ótta við að aðrir stælu hugmyndum þeirra, þá gekk þeim illa að fá samninga við væntanlega kaupendur, sem voru herir stórvelda þess tíma, Bandaríkjanna, Frakklands, Bretlands og Þýskalands.
22. mars 1906 fengu þeir einkaleyfi á flugvélinni. Loks náðu þeir samningum við Bandaríkjaher og franska samsteypu og hófu að sýna flug opinberlega árið 1908.
