Muse
Úr Wikipediu, frjálsa alfræðiritinu
Muse er bresk rokkhljómsveit sem var stofnuð í bænum Teignmouth í Suður-Englandi um miðjan 10. áratuginn. Hljómsveitin er tríó og meðlimirnir eru Matthew James Bellamy (söngur, gítar og hljómborð), Christopher Tony Wolstenholme (bassi) og Dominic James Howard (trommur). Bellamy er aðal lagahöfundur sveitarinnar en í seinni tíð hafa Wolstenholme og Howard látið meira að sér kveða.
Meðlimirnir gengu allir í sama skólann á sínum unglingsárum og voru þar í mismunandi hljómsveitum. Þegar þeir hófu samstarf gekk hljómsveitin undir nöfnum á borð við Gothic Plague, Fixed Penalty og Rocket Baby Dolls. Undir því síðastnefnda tóku þeir þátt í hljómsveitakeppni sem haldin var í bænum árið 1996 þar sem þeir spiluðu með miklum látum og brutu allt á sviðinu eins og þeir hafa svo gert nokkrum sinnum síðan, þá keppni unnu þeir með yfirburðum. Í upphafi var hljómsveitin aðeins leið þeirra félaga til að berjast við leiðindin í Teignmouth en þegar að því kom að þeir þurftu að velja á milli þess að fara í háskóla eða einbeita sér að hljómsveitinni þá völdu þeir tónlistina.
Aðaláhrifavaldurinn á tónlist Muse í upphafi var amerískt rokk frá fyrri hluta 10. áratugar, sérstaklega grugg sem var nokkuð frábrugðið britpoppinu sem þá var vinsælast á breskri grund. Hljómsveitin tók þá að nefna sig Muse og hélt tónleika í London og Manchester í von um að finna markhóp fyrir tónlist sína sem ekki var til staðar í heimabænum og reyna að komast í samband við útgáfufyrirtæki sem gæti komið þeim á framfæri. Bresk útgáfufyrirtæki reyndust þó treg til að gefa Muse tækifæri enda var þeirra hljómur nokkuð frábrugðinn því sem að þá var vinsælast. Það var svo loks bandaríska útgáfufyrirtækið Maverick Records sem að tók hljómsveitina að sér, studdi hana til að spila á nokkrum tónleikum í Bandaríkjunum og gerði síðan plötusamning við hana. John Leckie sem framleiddi The Bends plötu Radiohead var fenginn til að framleiða fyrstu plötu Muse sem kom út árið 1998 og hlaut nafnið Showbiz en margir greina töluverð Radiohead áhrif á henni.
Á næstu plötu, Origin of Symmetry sem kom út árið 2001, kvað við nýjan hljóm er hljómsveitin fikraði sig áfram í að þróa eigin hljóm. Tónlistin á Origin of Symmetry er þannig þyngri og dekkri og sést þetta einnig á textunum sem sumir hverjir eru með pólitísku ívafi. Til dæmis má nefna lagið New Born þar sem ekki er litið björtum augum til framtíðar þar sem tæknin er að eyðileggja samfélag manna. Söngstíll Matthew Bellamy á plötunni fór þó ekki vel í Maverick útgáfufélagið sem fór fram á að nokkrum lögum yrði breytt ef gefa ætti plötuna út í Bandaríkjunum, Muse neitaði og yfirgaf Maverick.
Árið 2002 gaf Muse út Hullabaloo sem innihélt tónleikaupptökur og gamlar b-hliðar.
Árið 2003 kom út platan Absolution, þar heldur þróunin sem átti sér stað með Origin of Symmetry áfram og svipaðar áherslur eru í lagasmíðum. Gegnumgangandi þema á þessari plötu eru hugleiðingar um framtíðina, heimsendi, samsæri, guðfræði, tækni og yfirnáttúruleg fyrirbrigði. Framleiðindi þessarar plötu var Rich Costey sem einnig vann töluvert með Rage against the Machine sem þykir við hæfi þar sem Matthew Bellamy lítur til Tom Morello fyrrum gítarleikara þeirrar sveitar sem fyrirmynd hvað varðar gítarleik og reyndar einnig til Jimi Hendrix. Almenn sérstaða Muse í rokkinu hefur orðið til þess að þeim hefur verið líkt við glysrokksveitina Queen sem var virkust á 8. áratug síðustu aldar en Matthew Bellamy hefur einnig viðurkennt að lagahöfundurinn og söngvarinn Freddie Mercury sé mikill áhrifavaldur.
Nýjasta platan kom út 2006 og kallast Black Holes And Revelations.
[breyta] Útgáfur
Plötur
- Showbiz (1999)
- Origin of Symmetry (2001)
- Hullabaloo (2002)
- Absolution (2003)
- Black Holes And Revelations (2006)
EP
- Muse (1998)
- Muscle Museum (1998)
- Dead Star/In Your World (2002)
Smáskífur
- Uno (1999)
- Cave (1999)
- Muscle Museum (1999)
- Muscle Museum U.S. (2000)
- Sunburn (2000)
- Unintended (2000)
- Plug in Baby (2001)
- New Born (2001)
- Bliss (2001)
- Hyper Music/Feeling Good (2001)
- Dead Star/In Your World (2002)
- Stockholm Syndrome (download only)(2003)
- Time Is Running Out (2003)
- Hysteria (2003)
- Sing For Absolution (2004)
- Butterflies and Hurricanes (2004)
- Supermassive Black Hole (2006)
- Knights of Cydonia (2006)
- Starlight (2006)
DVD
- Bliss (2001)
- Hullabaloo (2002)
- Time is Running Out (2003)
- Absolution (Takmörkuð útgáfa sem fylgdi plötunni) (2003)
- Hysteria (2003)
- Sing for Absolution (2004)