Le Corbusier
Úr Wikipediu, frjálsa alfræðiritinu
Le Corbusier (6. október 1887 – 27. ágúst 1965) var þekktur svissneskur arkitekt sem í raun hét Charles-Edouard Jeanneret. Hann fæddist í bænum Le Chaux-de-Fonds í svissnesku Júrafjöllunum en þar er mikil framleiðsla á klukkum. Faðir Le Corbusiers vann við að skreyta og grafa í klukkur og sonurinn ætlaði að feta sömu braut. Hann hóf nám í listaskóla bæjarins og tók að þjálfa sig í bæði leturgreftri og skreytingum.
Efnisyfirlit |
[breyta] Fyrstu ár
Le Corbusier sýndi snemma mikla hæfileika sem teiknari og var áhugasamur um myndlist. Það var þó ekki fyrr en listmálarinn og myndhöggvarinn Charles L´Eplattenier, kennari við listaháskólann, vakti áhuga hans á arkitektúr sem Le Corbusier lét sér detta í hug að hann myndi eiga eftir að sinna öðru en klukkum í framtíðinni.
Tæplega átján ára gamall fékk hann sitt fyrsta verkefni, að hanna og smíða villu fyrir einn af kennurum listaskólans. Þremur árum síðar hafði hann hannað tvær villur til viðbótar í Le Chaux-de-Fonds. Sem ungur listaskólanemi varð hann fyrir miklum áhrifum af nýjum stefnum og straumum á listasviðinu og var bæði þekktur sem listmálari og myndhöggvari þótt arkitektúrinn yrði hans aðalstarf.
Næstu árin ferðaðist hann mikið um, fór meðal annars til Ítalíu, Ungverjalands, Austurríkis, Frakklands og Þýskalands og hitti fræga hönnuði sem höfðu mikil áhrif á hann. Fyrstu teikningar að hinum svokölluðu Dominohúsum Le Corbusiers komu fram árið 1914, en þar notaði hann járnbenta steinsteypu og súlur eða burðarbita sem settir voru niður á grunnplötu hússins og báru síðan uppi næstu plötu fyrir ofan.
[breyta] París
Árið 1917 settist hann að í París og bjó þar æ síðan. Í París kom hann fram með róttækar hugmyndir. Hann vildi láta rífa fjölda húsa á hægri bakka Signu þar sem honum þótti of þröngt; götur mjóar og allt eins og í völundarhúsi. Hann sagði húsin væru óþægilegir bústaðir, þau gætu valdið fólki heilsutjóni og þar væri mikil eldhætta. Hann vildi reisa stór og mikil hús, nánast skýjakljúfa og tryggja að gatnakerfið yrði í samræmi við kröfur nútímans.
Í París kynntist hann listamanninum Amédée Ozenfant og saman skrifuðu þeir stefnuyfirlýsingu púrismans, Aprés le cubisme, árið 1918.
[breyta] Fimm punktar Le Corbusiers
Hinir svokölluðu fimm punktar eða meginatriði í arkitektúr eru tengd nafni Le Corbusier: Í fyrsta lagi notkun járnbentrar steinsteypu, öðru lagi þakgarðar, í þriðja lagi opin rými, í fjórða lagi að hafa glugga fremur lága en lárétta og láta þá jafnvel ná á milli burðabitanna og loks framhliðar húsa sem hægt var að hafa opnar eða lokaðar, allt eftir óskum en það var mögulegt með tilkomu járnbentu steypubitanna sem héldu plötunni uppi og þar var ekki nauðsynlegt að veggirnir bæru þungann.
[breyta] Húsgagnahönnun
Le Corbusier er líka mjög þekktur fyrir húsgögnin sín. Fauteuil grand comfort (stóll mikillia þæginda) hafa flestir einvhern tíma séð. Hann var hannaður 1928 og er enn framleiddur í dag. Stóllinn var fáanlegur með ýmis konar áklæði, en kýrhúð var vinsælust.
