Internacia organizaĵo
El Vikipedio
Juro > Internacia juro > Publika internacia juro > Internacia socio > Internacia organizaĵo
La internaciaj organizaĵoj estas subjektoj de la publika internacia juro kaj membroj de la internacia socio, same kiel la ŝtatoj.
Internacian organizaĵon karakterizas tio, ke nur ŝtatoj povas konsistigi ĝin. Simplaj individuoj, grupoj, asocioj k.s. ne povas esti membro de internacia organizaĵo.
Ankaŭ ekzistas internaciaj neregistaraj organizaĵoj kies anoj ne estas ŝtatoj, kaj kiuj arigas membrojn ĉirkaŭ iu temo (homrajtoj, ekologio, internacia lingvo, malsato, ktp.)
La nuntempa internacia socio enkalkulas multajn internaciajn organizaĵojn. Ĉi tiuj estas tre diversaj pro:
- siaj nombroj de ŝtatoj-membroj (Ekz.: UN=189, Benelukso=3),
- siaj celoj (Ekz.: UN/paco, OLEP/petrolo).
Tiuj organizaĵoj estas derivaj subjektoj de la internacia juro, t.e.:
- ilia kreado devenas de la ŝtatoj (la originaj subjektoj),
- ilia kompetenteco ne estas sama kiel tiu de la ŝtatoj: la internaciaj organizaĵoj havas specialan kompetentecon, dum la ŝtatoj havas universalan kompetentecon.
Kreitaj, tiuj organizaĵoj estas aŭtonomaj. El tio rezultas, ke:
- ili estigas rilatojn kun la ŝtatoj por ekz. difini la kondiĉojn, laŭ kiuj ili povos agadi sur la ŝtataj teritorioj kaj helpi la ŝtatojn.
- ili povas rilati kun aliaj internaciaj organizaĵoj:
- ĉu por esti membro de aliaj organizaĵoj (Ekz.: la Eŭropa Komunumo estas membro de la Monda Komerca Organizaĵo ekde 1995),
- ĉu por reciproke limigi siajn kompetencojn aŭ organizi komunajn agadojn.
- ene de la organizaĵo rilatoj estiĝas inter la ŝtatoj kaj la organizaĵaj organoj: por kontrolado, rekomendado, decidado... (Ekz. la rilatoj inter la Konsilio kaj la Komisiono kadre de la Eŭropa Komunumo)
La internaciaj organizaĵoj estas sendependaj unu de la aliaj. Fondite per malsamaj traktatoj, iliaj rilatoj estas kunlaboraj rilatoj.
Vidu ankaŭ : Listo de internaciaj organizaĵoj, Mondaj organizaĵoj
 |
 |
 |
 |
