Edvard Grieg
El Vikipedio
Edvard GRIEG (naskiĝis la 15-an de junio 1843, mortis la 4-an de septembro 1907) estis norvega komponisto kaj muzikisto, ĝenerale taksata la plej grava kaj genia el ĉiuj norvegaj komponistoj.
Edvard GRIEG naskiĝis en burĝa familio de Bergen, Norvegio, la kvara el kvin infanoj, kie la patrino estis la unua pianoinstruisto. Ĉar li estis naturdotita por muziko, la tiama fama violonisto Ole Bull konsilis sendi la junan Edvardon al la konservatorio en Lejpcigo. Tie li studis de 1858 ĝis 1862 kaj verkis siajn unuajn komponaĵojn. Sed la unuajn ĉefverkojn li komponis post sia edziĝo kun sia kuzino Nina Hagerup. Tio estas la melodioj opus 5 laŭ poemoj de Hans Christian Andersen.
Li verkis ankaŭ konĉerton por piano, sonatojn, kvaropon, kantojn, ktp., en kiuj oni ofte aŭdas la influon de la norvega folklora muziko.
Sed tio, kio donis al li internacian famon, estas la scenmuziko por Peer Gynt, teatraĵo de Henrik Ibsen. Tiu muziko de GRIEG estas nuntempe multe pli konata ol la teatraĵo.
