Ĝenerala Konsilio (Francio)
El Vikipedio
La Ĝenerala Konsilio (franclingve Conseil général) estas la balotita asembleo de ĉiu franca departemento. La ĝeneralaj konsilantoj estas balotitaj per universala rekta voĉdono, po unu konsilanto por ĉiu kantono. Iliaj mandatoj daŭras ses jarojn, kaj ili estas anstataŭigitaj duone ĉiu tri jaroj. La konsilantoj balotas internan "konstantan komisionon" (commission permanente), kiu enhavas prezidenton kaj plurajn vicprezidentojn. Tiu komisiono, precipe ĝia prezidento, estas la ekzekutivo de la departemento. La prezidento estas krome la hierarkia estro de la departementa administraro.
Hodiaŭ, la vorto "Ĝenerala" povas ŝajni stranga : fakte, antaŭ la kreaĵo de la Regionaj Konsilioj en 1972, la Ĝeneralaj Konsilioj estis la plej alta loka asembleo, do la plej "ĝenerala" (male de la municipaj konsilioj).
[redaktu] Historio
La leĝo de la 22-a de decembro 1789, kiu kreis la departementojn, ankaŭ ordonis la kreaĵon de "departementa konsilio" (Conseil de département) en ĉiu departemento : tiu instanco estis asembleo kun 36 balotitaj membroj. Ĝin forigis tamen nova leĝo la 4-an de decembro 1793.
La asembleoj reaperis kiel "Ĝeneralaj Konsilioj" danke al la leĝo de la 17-a de februaro 1800 (kiu ankaŭ kreis la prefektojn). La membroj de la novaj konsilioj, tamen, ne plu estis balotitaj sed estis nomumitaj de la registaro. Nur en 1833 refariĝis la Ĝeneralaj Konsilioj balotitaj asembleoj, unue per pagenda voĉdono kaj sekve (post la leĝo de la 3-a de julio 1848) per universala voĉdono.
Antaŭe, la prezidento de la Konsilio ŝanĝis ĉiujare. Ekde la leĝo de la 10-a de aŭgusto 1871, la ĝeneralaj konsilantoj balotas ilian prezidenton tuj post ĉiu renoviĝo de la asembleo.
[redaktu] Ĉefaj taskoj
La ĉefaj taskoj de la Ĝenerala Konsilio estas :
- Sociala helpo (financhelpoj...)
- La subtenado de la departementaj vojoj kaj la plenumo de la loka aŭtobusa transportado
- La kolegioj (duagradaj lernejoj)
- Kulturo (subtenado de la departementa arkivejo, ktp...)
La leĝo de la 13-a de aŭgusto 2004, kiu plietendigas la francan sencentralizon, konfidis novajn taskojn al la Ĝeneralaj Konsilioj, interalie :
- Subtenado de kelkaj naciaj vojoj
- Asistado de la maljunuloj kaj de la junuloj
- Administrado de kelkaj fondusoj pri loĝeco
