Пакт Молатава-Рыбэнтропа
Зьвесткі зь Вікіпэдыі — вольнай энцыкляпэдыі.
Пакт Мо́латава-Рыбэнтро́па — савецка-нацысцкі пакт аб ненападзе, падпісаны 23 жніўня 1939 г. у Маскве міністрам замежных справаў Нямеччыны Ёахімам фон Рыбэнтропам і народным камісарам замежных справаў СССР Вячаславам Молатавам. Дамова прадугледжвала таксама нэўтралітэт абодвых падпісантаў у выпадку нападу трэцяга бока.
У сакрэтным дадатковым пратаколе прадугледжваўся падзел Усходняе Эўропы на сфэры ўплыву Савецкага Саюзу і нацысцкае Нямеччыны. Польшча дзялілася па рэках Нарэв, Вісла і Сан. Ўзьядноўвалася БССР і Заходняя Беларусь уключна зь Вільняй, да Ўкраінскае ССР таксама адыходзілі вялікія ўкраінскія землі ў складзе Польшчы. Да савецкае сфэры ўплыву адыходзіла Бэсарабія (сёньняшняя Малдова), Эстонія і Латвія. У сакрэтным пратаколе прадугледжвалася высяленьне ў Нямеччыну насяляўшых савецкую зону немцаў (з Бэсарабіі, Балтыі, Букавіны).
Вынікам пакту стаўся перагляд дзяржаўных межаў пасьля заваёвы Нямеччынаю Польшчы (прыкладна пачатак кастрычніку 1939 г.). Дадатковым пагадненьнем ад 28 верасьня 1939 г. быў прадугледжаны адыход Летувы да савецкае зоны ўплыву ўзамен на перасоўваньне нямецкае мяжы ад Віслы да Бугу.
У знак замірэньня ў захопленым Берасьці, апынуўшымся на мяжы Савецкага Саюзу і Нямеччыны, прайшоў сумесны парад савецкіх і нацысцкіх войскаў.
Польшча ня здолела абараніцца ад нападу саветаў і нацыстаў. У адказ на напад Нямеччыны на Польшчу Вялікая Брытанія абвесьціла вайну Нямеччыне. 1 верасьня 1939 стаў пачаткам Другое Сусьветнае Вайны.
Кіруючыся пактам, у 1940 г. Савецкі Саюз выставіў ультыматум Румыніі, па якім яна вымушаная была аддаць Бэсарабію і паўночную Букавіну. Тры балтыйскія краіны - Эстонія, Латвія, Летува, у 1940 г. таксама былі далучаныя да СССР.
22 чэрвеня 1941 г. Адольф Гітлер парушыў пакт, напаўшы на Савецкі Саюз.