IBM

De Uiquipedia

IBM Personal System/2 Model 25.

International Business Machines Corporation (IBM, tamién nomá Big Blue) ye una empresa con base en Armonk, Nueva York, Estaos Uníos. Dedícase a facer y vender hardware, software y servicios rellacionáos cola informática. Tien más de 330.000 trabayaores por tol mundu, y ye la empresa de teunoloxíes de la información más grande del mundu.

Amás, ye de xuru una de les más antigües, si non la más antigua, nel so sector. El so orixe tá na empresa Tabulating Machine Corporation, que entamó Herman Hollerith en 1896. Hollerith trabayara pa la Oficina del Censu de los Estaos Uníos, y desendolcara máquines tabulaores que emplegaben tarxetes afuracáes pa representar y procesar los datos de la xente. Con eses ferramientes, el censu de 1890 fízose muncho más rápido que'l censu de 1880. Hollerith desendolcó máquines pa afuracar les tarxetes y pa lleeles.

Dempués, la Tabulating Machine Corporation amestóse a otres empreses y creóse IBM. El so fundador, Thomas J. Watson, fízose cargu de la empresa cuandu nun tenía más que 400 trabayaores, y en 1924 camudó-y el nome pa IBM. En 1952, más del 90% de les máquines tabulaores nos Estaos Uníos yeren de IBM.

La empresa bien ceo dexó otros productos de precisión que tenía (sistemas pa fichar nes empreses, reloxes, báscules) y centróse nes tarxetes afuracáes y nes máquines pa procesar información. Durante la Segunda Guerra Mundial y nos años siguientes, trabayó pal exércitu de los Estaos Xuníos, tando nes vistigaciones más punteres de la informática naquella dómina. Nos años 1960 desendolcó los modelos más importantes de mainframe.

La importancia de IBM ye grandísima. Amás del so tamañu descomanáu (sólo la división de software, si se dixebrase del restu, sería la segunda empresa de software más grande del mundu detrás de Microsoft) pue considerase responsable de dellos finxos na hestoria de la informática. Ficieron el primer discu duru, les primeres bases de datos relacionales, o los disquetes. Tamién desendolcó'l PC, un ordenador personal que ye la base de la mayoría de los que s'empleguen anguañu. L'ordenador de la familia AS/400 ye'l más vendíu del mundu, si dexamos aparte'l PC. IBM tien dellos centros de vistigación perimportantes, y trabayaores de la empresa ganaron cinco Premios Nobel, cuatro Premios Turing y munchos otros.

Últimamente, IBM dedícase abondo al desendolcu de software llibre y de códigu abiertu.