Bolos
De Uiquipedia
Los bolos son un deporte que toma'l nome de les pieces allargaes y base plana que los xugadores traten de derribar tirándo-yos una bola. Foi un deporte enforma popular hasta bien entráu el sieglu XX nes zones rurales de dellos países europeos como España y Francia, anque anguaño la variante más espardida ye'l bowling americanu.
Tabla de conteníos |
[editar] Los bolos n'Asturies
Les referencies de xuegos de bolos son frecuentes en cultures como la exipcia, la Grecia Clásica o Roma. Nel territoriu astur, Estrabón cita ente les diversiones de los sos pobladores la de llanzar tueros. Sicasí ye difícil establecer una venceya direuta ente estos xuegos y los bolos actuales, cuanto y más qu'hai testimonios de xuegos asemeyaos en cultures bien estremaes como la de Malasia o l'América precolombina.
Estudiosos como Gerardo Ruiz Alonso, que cita a J. Braun Trueba consideren probable que les modalidaes actuales practicaes na zona cantabro-astur son el resultáu de l'asimilación de xuegos franceses, ellos mesmos influyíos polos xuegos alemanes. Estos xuegos llegaron a Asturies a traviés del Camín de Santiago, pasando per Navarra y Castiella y Llión.
La importancia de los bolos na cultura tradicional asturiana faese patente nes lleendes sobre les ayalgues de les xanes nes que se mencionen bolos d'oru. Eses creyencies espliquen que munchos túmulos reciben el nome de El Xuegu bolos (Tresmonte, Les Regueres) o la Boleruca de los Moros (Monte Sueve, Colunga). N'otros casos, nomes como La Bolera (El Condao, Llaviana) faen referencia simplemente al llugar onde s’allugaba la bolera del pueblu.
La primer noticia de los bolos n'Asturies, una de les más antigües d'España, remonta a 1495. Trátase de la querella presentada por Alonso de Quintanilla, Contador Mayor de los Reis Católicos contra Nuño Bernaldo de Quirós por mexa-y pel escudu d'armes nel trescursu d'una partida de bolos que se xugó nel campu San Francisco d'Uviéu pela fiesta del corpus. Gracies a esti documenu históricu, conserváu nel archivu de Simancas, sabemos que los bolos recibíen el nome de byrlos, que yera un xuegu bastante popular y que yeren frecuentes les apuestes de vinu o cabritos.
Nel sieglu XVIII, según el testimoniu de Xovellanos, na mayoría de los pueblos y llugares d'Asturies hai siempre una bolera que ye'l sitiu onde aconceyen y xueguen los vecinos.
La popularidá del xuegu n'Asturies vese tamién reflexada nes menciones frecuentes na prensa de los sieglos XIX y XX y nes abondantes referencies lliteraries. Asina, les partíes de bolos apaecen n'obres d'autores que trataron temes asturianos como Armando Palacio Valdés (La Aldea perdida), Pachín de Melás (Les Veyures de Pinón, 1909), Francisco González Prieto (La vida asturiana e'nun cientu de sonetos, 1921) Alfonso Camín (La danza prima y nuevos poemas, 1954), Alejandro Casona (La casa de los siete balcones, 1957).
La popularidá del xuegu nos primeros años del sieglu XX fizo que se llegare a crear una Federación asturiana de bolos, desapaecida cola guerra civil. Tres de la guerra volvieron a entamar los concursos. Nel añu 1962 restablecióse la Federación Asturiana de Bolos y organícense campeonatos federaos. Sicasí, fenómenos como l'éxodu rural, la competencia con nueves diversiones como'l fútbol llevaron a una cierta escayencia de los bolos. Anque les modalidaes más populares (cuatriada, birle) resistieron bien, otres como los bolinos, el cuatrín de Cuideru quedaron desaniciaes.
Nos años 80, y 90 del sieglu XX, col repunte d'interés pola cultura tradicional que traxo consigo'l procesu autonomicu, asistimos a una cierta recuperación de los bolos. Anguañu hai bayura de campeonatos y torneos y los bolos son un deporte bastante popular con una bona cantera de xugadores nes principales variedaes (cuatriada, birle, batiente y bolu celta).
[editar] Modalidaes
Hai dos modalidaes principales de bolos: nuna trátase de derribar los bolos con habilidá (cuatriada, birle). N’otros casos (batiente, bolu celta), amás de tumbar los bolos hai que los echar más p'alla d'una raya, colo que se combina l'habilidá y la fuercia física.
- Modalidaes federaes
- Cuatriada: fastera centro-oriental d'Asturies.
- Birle o bolu palma: fastera oriental d’Asturies y Cantabria.
- Batiente o batiente rodáu : fastera centro-occidental d’Asturies (predomina na costa)
- Pasabolu de Tinéu o bolu celta.
- bowling o bolos americanos.
- Bolu llionés
- Tres tablones
- Bearn
- Otres modalidaes
- Bolos de Saliencia
- Bolos de Cangas del Narcea o bolu vaqueiru.
- Bolos de la cuenca del Navia
- Pasadiez o pasabolu de Somiedu
- Bolos rodaos
- Bolos de L.luarca
- Cuatrín d’Agones (Pravia)
- Cuatrín pixuetu
- Bolinos (Cuideiru).
- Cuarta de Degaña
- Dexabolu
- Birllas
- Bolu serrano
- Bolu pasiegu
- Bolu palentinu
- Bolu burgalés
- Bolu maragato
- Bolu berciano
- Bitlles
- Labort
[editar] Bibliografía
- García Acebal (E.): “Deportes” en Gran Enciclopedia Asturiana. Xixón, Silverio Cañada, 1981.
- Braun Trueba (J.): Bolos y cultura. Aportación al origen y desarrollo de los bolos de Cantabria. Santander, Artes Gráficas Resma, 1984.
- Ruiz Alonso (J. G.): Bolos asturianos. Modalidaes, téunica y estáu actual. Xixón, Alborá llibros ediciones, 1992.
- Ruiz Alonso (J. G.): Los bolos en Asturias. Xixón, Alborá Llibros Ediciones 2000.
