Bill Gates
De Uiquipedia
William Henry Gates III, nacíu el 28 d'ochobre de 1955 en Seattle (Washington, Estaos Uníos).
Creó la empresa de software Microsoft en 1974, siendo inda alumnu en la Universidá de Harvard. En 1976, abandona la universidá y va a Alburquerque, sede de Altair, pa pactar con esa empresa la cesión d'un llinguax Basic, a porcentax del 50% de ventas. Al año siguiente, enterase del éxitu d'Apple y de que necesiten un Basic. Intenta presentar la so versión a Apple, pero nin siquiera ye recibíu.
En 1980, como presidente de Microsoft, axúntase cola direutiva d'IBM en Seattle, u llogra vende-yos el sistema operativu DOS, magar qu'él tovía nun lo tenía. A IBM facía-y falta esi sistema operativu pa competir a la escontra d’Apple, razón pola cuál la negociación ye flexible. Microsoft quier los drechos de llicencia, mantenimientu, ya tamién la capacidá de vende-yos el DOS a otres compañíes. IBM acepta, considerando que lo que-y produz dividendos ye l‘hardware. Unos díes dempués, Microsoft merca’l Disk Operative System a un informáticu por 50.000 dólares. Consciente de la importancia l'entornu gráficu que sacara Apple nel so ordenador Lisa (cuyu nome correspuende a la primer fía de Steve Jobs), proponese algamar tamién l’entornu gráficu y ratón. Demientres Steve Jobs, fundador d’Apple, entama’l desendolcu del Macintosh, Bill Gates visita Apple. Ofrez alicar les sos fueyes de cálculu y otros programes. Amenaza con vender el so material informáticu a IBM, colo que llogra una alianza Apple + Microsoft. Esta cabera faise cola teunoloxía d’entornu gráficu y ratón, y saca al mercáu Microsoft Windows, como direutu competidor de Macintosh.
El sistema operativu Microsoft Windows (en toles sos versiones), yera emplegáu nel añu 2002 na mayor parte de los ordenadores personales del mundiu.
Bill Gates encabeza la llista anual deles mayores fortunes personales fecha pola revista Forbes, con bienes calculaos alredior de los 40.700 millones de dólares americanos (2.003). En 1994, mercó un manuscritu de Leonardo da Vinci por 25 millones de dólares.
La so empresa vióse envuelta en abondos procesos xudiciales acusada de práutiques monopolístiques, llegándose a especular tamién cola posibilidá de que los tribunales norteamericanos exixeran frayar la empresa, como ya pasara con otres empreses americanes nel pasáu. Les acusaciones rellaciónense cola amestadura de dellos programes al so sistema operativu, el más espardíu, lo que ye tomáu polos sos competidores como un abusu de posición dominante pa diverxer los sos productos, como ye'l casu'l navegador Internet Explorer incluyíu nel sistema operativu Windows.
