Esquilo

De Biquipedia

Esquilo (525 a. C. - 456 a. C.; en grieco: Αισχυλος) estió un dramaturgo de l'antiga Grezia, o primero de os tres grans trachicos griecos.

[Editar] Biografía

Naxito en Eleusis, en a redolada d'Atenas, escribió as suyas primeras obras ta 498 a. C., pero, d'entre as que han perbibito, a más antiga probablemén siga Hikétides (As Suplicadoras), escrita alto u baxo en 490 a. C.. En ixa añada partizipó tamién en a batalla de Maratón, e en 480 a. C. luitó en a batalla de Salamina, feito que reflexó dimpués, ta 472 a. C., en a suya obra Persai (Os Persas).

Esquilo biachaba con frecuenzia ta Sizilia, an que gubernaba o tirano de Gela, probablemén per os muitos artistas que i acudiban á ormino. En 458 a. C., lo fería per zaguer bez; seguntes una leyenda tradizional, Esquilo morió en 456 a. C. cuan una alica (u bel cluxigüesos), creyendo que a calbera de o escritor yera una piedra, dixó cayer una tortuga sobre a suya capeza. Altras bersions dizen que l'alica dixó cayer una piedra sobre o que creyó lo güego d'un abe no bolandera.

Él mesmo escribió antis de morir a inscripzión que fegura en a loseta de a fuesa suya, sin dar treslato de a suya fama teyatral, querendo nomás que commemorar os suyos trunfos melitars. En ella, i diz:

"Αισχύλον Ευφορίωνος Αθηναίον τόδε κεύθει μνήμα, πεπνυμένον πυροφόροιο Γέλας. Αλκήν δ' ευδόκιμον μαραθώνειον άλσος αν είποι και βαθυχαιτήεις Μήδος επιστάμενος"

"Ista loseta cubre a l'ateniense Esquilo, fillo d'Euforión, que morió en a fecunda Gela. Os campos de Maratón parlarán de o suyo corache, como tamién os medas, de luengo pelo, que l'aprendioron bien".

[Editar] Obras

As obras d'Esquilo azentúan os aspeutos morals e relichiosos. Á diferienzia d'os altros dos trachicos, Sofocles e Euripides, bellas trachedias d'Esquilo rematan con menor dureza, sobre tot en a suya obra mayestra, a trilochía clamata Oresteia (A Orestía, Orestiada u trachedia d'Orestes). A rematanza ye claramén trachica en as dos primers piezas de a trilochía, debez que en As Suplicadoras, Os Persas, e Hepta epi Thebas (Siete cuentra Tebas).

Amás de a balura literaria de a suya obra, a contrebuzión más gran d'Esquilo á o teyatro estió a encorporazión d'un segundo actor en as suyas eszenas. Enantis, l'aizión ocurriba entre un solo actor e o coro grieco.

De as 70 obras que se suposan escritas per Esquilo, sólo que seis perbiben en l'autualidá:

• Hikétides (As Suplicadoras) (490 a. C.?)
• Pérsai (Os Persas) (472 a. C.)
• Hepta epí Thébas (Siete cuentra Tebas) (467 a. C.)
• Oresteia (trilochía de A Orestía u Orestiada) (458 a. C.)
  • Agamémnon (Agamenón)
  • Choephóroi (As Coeforas)
  • Eumenídes (As Eumenides)

Antiparti, tradizionalmén s'ha atrebuyito á Esquilo una setena obra: Prometeu encadenato. Muitos estudiosos autuals consideran que ixe Prometeu ye obra d'un dramaturgo esconoxito de o sieglo IV a. C.. A luenga no se parex pas á la d'Esquilo, e a suya ostilidá ta la fegura de Zeus choca con a bisión más relichiosa de as altras seis obras.

En as primeras añadas de a decada de 1990, se troboron entre as bendas d'una momia echipzia bels fragmentos d'un altra obra d'Esquilo que eba aparexito menzionata en fuens antigas. A obra, clamata Aquiles, yera parti d'una trilochía sobre a Guerra de Troya, e lebaba perdita más de 2.000 años.