Mierkidi
Èn årtike di Wikipedia.
Li mierkidi (ou dimiek) est l' no do troejhinme djoû del samwinne, li cwatrinme po les Djwifs et ls Arabes.
Li foûme dimiek egzistêve co coranmint divant les anêyes 1900 et des dins des plaeces k' i gn a; mins c' est l' foûme avou aplacaedje tîxhon k' est ouy li pus corante. Li mot vént do latén mercuri dies ki vout dire "li djoû di Mierkeure" (li diu romin oudonbén l' planete).
Ezès tîxhons lingaedjes li djoû est purade lomé "djoû d' Wotan" (k' est li diu dins l' mitolodjeye tîxhone ki corespond a Mierkeure po les romins). E djaponès on l' lome "djoû del aiwe" (水曜日, suiyōbi), mins ciste aiwe la pout esse veyowe soeye-t i come onk des cénk elemints prumioûles des Chinwès (li feu, l' aiwe, li bwès, li metå eyet l' tere) ou come l' acourtixha do no del planete Mierkeure (水星, suisei), dj' ô bén, ki l' djoû est lomé come amon nozôtes. E chinwès c' est tot simplumint li "troejhinme djoû del samwinne" (星期三 u 週三); ey e portuguès et grek, li "cwatrinme" (quarta-feira, τετάρτη).
Mins sacwants lingaedjes, come l' almand ou bén li polonès, li lomèt "li djoû do mitan del samwinne" (Mittwoch, środa)
Li mierkidi après-nonne est condjî po les scolîs walons.
