Wikipedia:Standoardvlams
From Wikipedia
D'r es e groot verschil tusschn 't West-Vloms en olle andere dialect'n in Vloandern en Olland. In 't West-Vlams zin d'r en hele reke klank'n die je nievers elders goat werevind'n. Ook vele word'n, uutdrukkiengn en vervoegingn goa je ollene moa in 't West-Vlams tegenkomn, lik de vervoegienge van ja, nêe en ols om moa e voorbeeld te geevn.
Moa bin 't West-Vlams zin d'r nog vele onderlienge verschiln. De bedoelienge van 't Standoardvlams (ofkortienge SV) es om een overeenstemmienge te ein tusschn ol de schrivers die up dizzen Wikipedia actief zin omtrent de maniere woarup da me ol die specifieke klank'n goan speln.
't Standoardvlams es dus 't resultoat van ne compromis. En diene compromis wos nôdig. Up langern termin moe 't Standoardvlams de referentie komn vo olle West-Vloamiengn die in under eigen toale willn schrivn, en dat es ambitieus. Mo 't es 't SV in d'eerste plekke te doene om olle West-Vlamsche tekst'n serieus én anveirdboar te moak'n vo niet-West-Vloamiengn, wuk da ollene meugelik es oen olle West-Vloamiengn up dezelfste maniere schrivn.
Ook est zo da 't Standoardvlams nog in vulle ontwikkelienge es. Ge goat doa nog niet'n were vind'n over vervoegiengn, meervoud'n, verklinword'n en zo. D'r zin wel ol en poar artikels geschreevn die goan over de word'nschat en de grammatica van lokoal West-Vlams, kiddekee bie West-Vlams en Vormleer.
Uus SV es nie ontworp'n bie en universiteit, nint, SV es 't resultoat van vele voorstel'n en verbeteriengn die komn van de schrivers van de West-Vlamsche Wikipedia. Ol die gast'n ein en upmerkelik ontwikkeld toalgevoel en oud'n under vele mei toale bezig. Da wil dus zeggen da 't Standoardvlams vo olle West-Vloamiengn gemakkelik herkenboar zoe moe zin en nie vree moeilik om te gebruuk'n en te schrivn. En dat es zekers de bedoelienge.
