Detective Conan

Mula sa Tagalog Wikipedia, ang malayang ensiklopedya.

Edisyong Ingles ng Detective Conan bilang Case Closed, unang bolyum na nobela.

Ang Detective Conan (名探偵コナン, Meitantei Konan), kilala bilang Case Closed sa Estados Unidos, ay isang seryeng detektib manga at anime sa bansang Hapon na ginawa ni Gosho Aoyama, at inilalathala sa magasin na Weekly Shonen Sunday.

Isinagawa ng TMS Entertainment ang bersyong anime nito. Sa kasalukuyan, nagkaroon na ito ng mahigit sa 400 na mga kabanata sa telebisyon at 9 na pelikula sa bansang Hapon. Hindi pa rin tapos ang anime na ito hanggang sa kasalukuyan. Noong Hulyo 2003, ipinahayag ng FUNimation na nilisensya nila ang Detective Conan para ipalabas sa Estados Unidos bilang Case Closed dahil sa isyung legal na may kaugnayan sa pangalang Conan (Conan the Barbarian). Sa maraming parte ng mundo na pinalabas ito, nanatili ang pangalang Detective Conan (o ang literal na salin nito). Naipalabas na ito sa Espanya, Alemanya, Italya, Pilipinas, United Arab Emirates at iba pang bansa.

[baguhin] Istorya

Babalang pang-spoiler: Sumusunod ang detalye ng balangkas at/o katapusan.

Sa simula ng istorya, isang sikat na detektib si Shinichi Kudo sa kanyang hayskul. Isang araw, pumunta si Shinichi sa isang theme park na may pangalan na Tropical Land. Kasama niya si Ran Mouri, ang kanyang kaibigan mula pa pagkabata. Habang naroon sila, nalutas ni Shininchi ang pagpatay sa isang pasahero ng roller coaster. Habang pauwi na siya galing sa Tropical Land, nakakita ng mga taong nakaitim na may nakakahinalang gawain. Nakita siya ng isa mga taong iyon at pinatulog siya. Sapilitang pinainom si Shinichi ng Apoptoxin-4869 (APTX-4869), isang lason na dapat sana'y pumatay sa kanya, ngunit hindi siya namatay. Nang nagkaroon siya ng malay, nalaman niya na naging bata na siya.

Nalaman ito ni Dr. Hiroshi Agasa at pinayuhan si Shinichi na itago ang kanyang pagkatao para hindi malaman ng mga taong nakaitim na buhay pa siya. Nang tinanong siya ni Ran kung sino siya, nakakita siya ng mga librong isinulat nina Arthur Conan Doyle at Edogawa Rampo at sinabing siya si Conan Edogawa. Simula noon, naging "Conan Edogawa" ang pangalan niya. Iminungkahi ni Dr. Agasa na tumira si Conan kasama si Ran, at pumayag si Ran.

Isang detektib din ang tatay ni Ran na si Kogoro Mouri pero hindi masyadong magaling. Laging si Conan ang lumulutas ng mga kaso kasama si Kogoro. Dahil bata lang si Conan, hindi siya pinapansin ng mga pulis. Kaya ginagamit niya si Kogoro sa paglulutas ng kaso sa pamamagitan ng pagpapatulog sa kanya gamit ng isang watch-type anaesthesia gun at nagkukunwari na si Kogoro gamit ng isang voice-changing bowtie.

Ilan pang mahalagang tauhan na lumabas sa series ay ang mga magulang ni Shinichi na sina Yusaku at Yukiko Kudo, at ang karibal na detektib at kaibigan na si Heiji Hattori

Ang ilang mga karakter na hindi pa lumabas sa bersyong Tagalog ng Detective Conan ay ang magnanakaw na si Kaito Kid, ang imbentor ng APTX-4869 na si Shiho Miyano (alyas Sherry nang nasa Black Organization; naging bata siya pagkatapos niyang lunukin ang APTX-4869 para makalabas sa organisasyon, at naninirahan kasama si Dr. Agasa sa pangalang Ai Haibara), at ang ibang miyembro ng Black Organization na sina Tequila, Calvados, Pisco, Vermouth, Kir, Chianti, Köln, at isang misteryosong boss.

[baguhin] Mga tauhan

Shinichi Kudo — isang detektib ng isang hayskul na naging bata at nabuhay bilang si Conan Edogawa.
Ran Mouri — ang kaibigan ni Shinichi mula pa pagkabata. May nararamdamang pag-ibig si Shinichi sa kanya. Ganun rin si Ran. Pero hindi pa nila ito inaamin tuwing magkaharap sila.
Kogoro Mouri — isang pribadong detektib na hindi masyadong magaling sa paglutas ng kaso. Ikinasal siya kay Eri Kisaki, isang matagumpay ng abogada. Sa kasalukuyan ay naghiwalay na sila.
Hiroshi Agasa — makalimuting propesor na nag-iimbento ng mga bagay na makakatulong kay Conan sa paglulutas niya ng kaso.
Juuzo Megure — inspektor na kumukuha ng mga clue na hindi nakita nina Conan at Kogoro. Dati niyang kasama sa trabaho si Kogoro.
Ayumi Yoshida — isang batang babae na nakipagkaibigan kay Conan. Miyembro siya ng Junior Detective Squad. (Detective Boys sa orihinal na bersyon)
Genta Kojima — kaibigan ni Ayumi. Lagi niyang sinasabi na siya ang lider ng Junior Detective Squad.
Mitsuhiko Tsuburaya — kaibigan ni Ayumi na gumagamit ng scientific approach.
Sonoko Suzuki — matalik na kaibigan ni Ran. Naloloka siya sa mga lalake. May kapatid siya na ang pangalan ay Ayako Suzuki.
Heiji Hattori — ang karibal na detektib ni Shinichi na galing sa Osaka. Di nagtagal ay naging magkaibigan sila ni Shinichi. May relasyon siya kay Kazuha Toyama.
Shiho Miyano — (alyas Sherry, Ai Haibara) — dating miyembro ng Black Organization na gumawa ng APTX-4869, ang drogang nagpaliit sa katawan ni Shinichi. Tinaksilan niya ang organisasyon dahil pinatay ni Gin ang kapatid niya na si Akemi Miyano. Linunok ni Shiho ang droga at naging bata. Naninirahan na siya ngayon kasama si Dr. Agasa sa pangalan na Ai Haibara. Naging miyembro siya ng Junior Detective Squad. (Hindi lumabas sa bersyong Tagalog.)
Yusaku Kudo — ang tatay ni Shinichi. Isa siyang sikat na manunulat ng mga kwentong detektib, lalo na sa mga kuwento tungkol kay Night Baron.
Yukiko Kudo — ang nanay ni Shinichi na isang dating aktres.
Kaitou Kid — isang magaling na magnanakaw na hindi pa naaaresto. Kamukha niya si Shinichi. Nagkaroon rin siya ng sariling seryeng manga na may pangalan na Magic Kaito. (Hindi lumabas sa bersyong Tagalog.)
Vermouth — isa sa mga importanteng miyembro ng Black Organization. Ang kanyang totoong pagkatao ay Sharon Vineyard, isang Amerikanong aktres na natutunan ang pagbabalatkayo kasama si Yukiko Kudo. (Hindi lumabas sa bersyong Tagalog.)
Gin — isa ring importanteng miyembro ng Black Organization. Siya ang nagbigay ng APTX-4869 kay Shinichi.
Vodka — miyembro ng Black Organization na laging kasama si Gin.

[baguhin] Ang pag-ere sa Pilipinas

Setyembre 10, 2001 unang ipinalabas ang Detective Conan sa Pilipinas. Naipalabas ito sa GMA 7 tuwing alas-4 ng hapon. Makalipas ng dalawang buwan ay natanggal ito sa ere. Binalik uli ito ng GMA noong Oktubre, 2002 at tinanggal noong Pebrero, 2003.

Ipapalabas ang Detective Conan sa Animax, eksklusibo sa Pilipinas, simula sa Enero 16, 2006.