Vizzini

From Wikipedia

Vizzini

Muttu: : Di nvernu ogni fichitieddu di musca è sustanza
Nomu ufficiali:	Vizzini
Pruvincia:	Catania (CT)
Superfici:	125 km²
Abbitanti:	7.070
Dinzitati:	57 ab./km²
Cumuni cunfinanti:	Buccheri (SR), Francufonti (SR), Giarratana (RG), Licodia Eubea, Militeddu in Val di Catania, Miniu
CAP:	95049
Prifissu telefònicu:	+0933

Vizzini è un cumuni di 7.070 abbitanti dâ pruvincia di Catania.

[cancia] Storia

Vizzini è un paisi di l'Ibblei. L'orìggini di Vizzini è assai antica; lu tistimonia la prisenza di nummirusi grutti trugludìtichi. Nutizzî pricisi si hannu a pàrtiri di l'Etati dû Brunzu. Di stu pirìudu Ippolito Cafici rinvinìu, nnâ cuntrata Tri Canali, nu ripustigghiu ca oi è visitàbbili ô Museu Paolo Orsi di Sarausa.

Secunnu quarchi studiusu, Vizzini fussi la vecchia Bidi di cu' pàrrunu Tucìdidi, Ciciruni e Pliniu. Lu nomu divinissi dû grecu Bedis, appoi addivinutu Bidi o Bidini ni l'èpuca rumana, canciatu in Bizini di l'àribbi, appoi cû tempu addivintau Vizzini, comu lu chiàmanu oramai chiddi dû postu.

Na mpurtanti funti stòrica, chidda di Tucìdidi, ni dicìa ca un certu Feace vinni mannatu nnâ Sicilia di l'atinisi comu ammasciaturi pì prucurari, nnî culonî jònichi, alliati a favuri dî Leontinisi pâ guerra ca chisti fìciunu contru a Sarausa nnô sèculu V a.C.. Lu fattu ca Vizzini rispunnìu a ddu appellu è na cunferma (oltri li reperta archiulòggici rinvinuti ni l'èpuca greca) ca nun sulu esistìa prima dû V sèculu a.C., ma ca macari avìa arraggiungiutu nu sviluppu tali di pussidiri na milizzia accussì mpurtanti di fari anteressari Ateni. La cità, doppu ca li greci e li rumani (di cui si hannu picca nutizzî), fu adduminata dî Bizzantini e appui di l'àribbi. Lu granni giògrafu àribbu Al Idrisi la discrivìa comu na cità ca "è sittata supra un munti, havi campa di semininaggiuni e nu bonu tirrenu".

Doppu la duminazzioni àribba, si havi nutizzia ca nnû 1105 Achinos de Bizinos nstaurau la sò corti e ca nnû 1177 lu conti Robertu de Bizino fiùra ntra li testimoni dî nozzi dû re nurmannu Guglielmu II ccù Giuvanna di 'Nghilterra. E' ni stu piriudu ca veni a furmàrisi, attornu ô Casteddu (c'addivintirrà carzari ni l'ità burbònica), lu primu nucliu dâ cità, circunnatu dî mura. E' sempri ni stu piriudu, nnô 1224, ca secunnu la tradizzioni Sant'Antoniu di Pàduva fundau lu Cunventu di l'Annunziata. La cità canuscìu nu mumentu mpurtanti da sò storia quannu, nnô 1252, Curradu IV di Svezia ci desi lu privileggiu di "pirpitua dimanialità", mpignànnusi a nun la dari cchiù comu barunìa o fiudu. E macari quannu, pì 6 voti, fu data a nu fiudatariu, arriniscìiu sempri a libbiràrisi.

Nnô 1282 la città participau â Rivulta de' Vespri. Doppu la paci di Caltabillotta (1302), essennu passata sutta ô duminiu dî l'aragunisi, vinni pigghiata di Manfredi Alagona e dû baruni di Licudia Ughettu Santapau, nunustanti fussa assignata a "Càmmira Rigginali", stitujuta di Federicu III nnô 1361. Sulu nnô 1403, doppu la ricustituzioni dâ "Càmmira Rigginali" a favuri di Bianca di Navarra, Vizzini s'arripigghiau la libbirtà. Ne' primi anni dû sèculu XV, la cità mudificau la sò struttura urbanìstica ngrannènnusi oltri li mura medivali, suprattuttu versu orienti, nnâ cuddina dû Calvariu, truvannu tri assi principali d'ispansioni ca currispùnnunu ê ttuali Via Roma, Via Vittoriu Emmanueli e Via San Giuvanni.

Nnô 1536, doppu l'avvintu di Carlu d'Asburgu, la cità torna ni un piriudu unni, sia pì arginari l'insidî sempri apprisenti nnê baruna vicinu, sia pì aggrazziàrisi lu guvernu, accumincia ad accattàrisi a caru prezzu na manciata di privileggia e tìtula onurari, comu chiddu appuntu di "Pirpitua Dimanialità", "Meru e Mistu Imperu", "Cita' fidilissima", oltri â pussibbilità di elèggiri un veru e propiu Cunsigghiu Municipali. Vizzini finu a prima mità dû Seicentu appi na cuntinua ispansioni, finu ad aviri oltri 16.000 abbitanti (cchiù assai dû duppiu di l'attuali 7.000). Macari c'avìa addivintatu un centru cchiù ca influenti ntâ Sicilia, nun anterrumpìu mai la sò cumplicata storia ca la vidìa sempri in lutta cu cocchi fiudatariu ca ni rivinnicava li diritti di pussidimentu. Accussì fu nò 1648, quannu fu data comu fiudu ò genuvisi Nicolò Squittini. Sulu appena trint'anni doppu, nò 1679, grazzi a Don Giuvanni Caffarelli arrinisciu, comu avia succiurutu autri voti, a ripigghiarisi la libbirtà.

Nò 1693 macari Vizzini subbiu li catastrofici cunsiguenzi dù trimennu tirrimotu ca divastau assai paisi na Val di Notu. Mossuru quasi 2.500 pirsuni, sulu 400 pò cidimentu da Cupula da Matrici, mentri prijauvunu propiu pì scongiurarisi di lu piriculu dù tirrimotu doppu ca avia datu nu avvirtimentu, ccù cocche scossa di cchiù picca putenza, a malapena dù jorni prima di chidda fatali. Pì tuttu lu seculu XVIII Vizzini happa li stissi sorti di quasi tutti li paisi da' Sicilia, subennu li diversi prisenzi ca siguenu ni la storia di l'isula: di l'Asburgu 'e Savoia, di l'Austriici 'e Burbuni. Nò 1848, duranti li moti carbunari, asvintulau pà prima vota nò Municipiu la bannera triculuri taliana, ma pì picca: finu a quannu, ccù Firdinandu fu arristauratu lu vecchiu riggimi e i libbirali vinnunu pirsiguitati. Pirò i Sinnici, macari ni l'èpuca sabauda, continuanu a essiri scigliuti tra i nobbili dù postu: Catalanu, Cafici, Passanisi, Gaudiusu, Giusinu, Caffarelli. Nò 1860 assai vizzinisi jenu appressu a Garibbaldi c'avìa sbarcatu in Sicilia e s'arruolanu ne' cammisi russi. Succesivamenti la città ottiniu l'annessioni na' casa Savoia, di cu' fu sempri fideli. Ni stu piriudu nasciu Giuvanni Verga (1840-1922), lu quali accuminciau ad ambintari bona parti da sò òpira littiraria a Vizzini: la "Cavalliria Rusticana", "Mastru Don Gisuardu", "La Lupa", "Jeli lu picuraru". Lassannu jiri lu piriudu ca vapi di la Prima Verra Munniali ò fascismu, sinu a la Sicunna Verra Munniali, picchì storia troppu ricenti, va sulu arricurdatu ca subbitu doppu la Secunna Guerra Munniali Vizzini segua la dulurusa storia di assai àutri centra di la Sicilia e di lu Minzujornu d'Italia, subennu na ranni undata mirratoria (suprattuttu versu l'Australia) di circa 12.000 abbitanti, passannu di 20.885 a li attuali 7.100.