Skotår

Frå Wikipedia – det frie oppslagsverket

Eit skotår er eit år som har ein dag meir enn eit normalt år.

Jorda brukar ca. 365,2422 dagar på ein runde rundt sola. For at dette skal passa inn med vår kalender har me sett inn skotår. Eit normalt år har 365 dagar, med 28 dagar i februar. I eit skotår har februar ein ekstra dag, altså 29 dagar, og samla 366 dagar for heile året.

Grunnen til at den ekstra dagen vart lagt til februar, og grunnen til at februar er så mye kortare enn dei andre månadene er at i den eldre romerske kalenderen var mars den første månaden i året og februar den siste.

Ein kuriositet er at den «nye» dagen ikkje vart lagt sist i månaden, men etter den 24. februar. Den 24. februar var av romarar kalla dag 6 før Kalendæ i mars. Skotdagen vart då kalla den andre dag 6 før Kalendæ i mars. Kalendæ er romarane sitt navn på den første dagen i månaden, og dei rekna seg bakover til Kalendæ, der dag 1 før Kalendæ var Kalendæ sjølv.

Eit skotår er normalt kvart fjerde år — i alle årstal som er delelege med 4. Unnataket er hundreåra (1700, 1800, 1900 osv.), som ikkje har skotår med mindre dei også er delelege med 400 (1200, 1600, 2000, 2400 osv.). Det var såleis skotår i 2000, men skotåret fell bort i 2100.

Denne fordelinga av skotår vart innført i Noreg med den gregorianske kalenderen i år 1700.