Norsk Hydro
Frå Wikipedia – det frie oppslagsverket
Norsk Hydro er eit norsk energiselskap, ofte omtala berre som Hydro. Hydro har 36 000 tilsette, fordelt på verksemd i 40 land (2003). Selskapet er organisert i tre divisjonar: Olje & Energi, Aluminium og andre verksemder. Selskapet er eit Fortune 500-selskap og inngår òg i Dow Jones-indeksen for bærekraftige selskap i tillegg til FTSE4Good-indeksen.
Om lag to tredelar av eigarinteressene i Norsk Hydro er på norske hender. Av dette utgjer den norske staten sin eigardel 43,8 prosent.
Hovudkontoret ligg på Vækerø i Oslo, der Eivind Reiten leier selskapet som generaldirektør. I Noreg har Hydro fabrikkar på Rjukan, Porsgrunn, Vennesla, Karmøy, Høyanger, Årdal, Sunndalsøra, Holmestrand, Magnor og Raufoss.
Innhaldsliste |
[endre] Historie
Selskapet vart grunnlagd den 2. desember 1905 av Sam Eyde og Kristian Birkeland med det fulle namnet Norsk Hydro-Elektrisk Kvælstofaktieselskab. Den svenske Wallenberg-familien hjelpte til med å finansiere det nye selskapet. Selskapet var basert på eit patent av Birkeland. Ein lysboge vart nytta til å laga nitrogenbasert kunstgjødsel. Til dette trengde ein elektrisk energi, som vart skaffa ved å byggja ut Svelgfossen ved Notodden.
I 1951 byrja selskapet å produsera magnesium. Det vart vedteke å byggja eit smelteverk for aluminium på Karmøy i 1963. Etter den fyrste konsesjonstildelinga for norsk kontinentalsokkel i 1964 har Hydro bygd opp ei stor petroleumsverksemd. Verksemda førde til ei satsing på petrokjemi. Satsinga på aluminium vart forsterka i 1986 då lettmetalldivisjonen vart fusjonert med Årdal og Sunndal Verk. I 2002 vart tyske Vereinigte Aluminium Werke kjøpt opp. I 2004 vart landbruksseksjonen skilt ut som eit eige selskap og børsnotert under namnet Yara International ASA. Hydro dreiv òg ei tid med fiskeoppdrett. Oppdrettsverksemda vart seld til nederlandske Nutreco i 2000.
[endre] Divisjonar
[endre] Olje og energi
Hydro Olje & Energi er operatør for 15 olje- og gassinstallasjonar. I 2003 var selskapet sin gjennomsnittlege eigenproduksjon på 530 000 fat olje pr. dag. Det er norsk kontinentalsokkel som er selskapets hovudbase, men Hydro driv i tillegg med petroleumsverksemd i Angola, Canada, Russland og Libya. For tida er selskapet ansvarleg for utbygginga av naturgassfeltet «Ormen Lange-feltet» utafor Midt-Noreg.
Selskapet har òg verksemd knytt til vasskraft og vindkraft. I tillegg vert det drive med handel knytt til energi over heile Europa.
[endre] Hydro Aluminium
Hydro Aluminium er mellom dei tre største aluminiumsselskapa i verda og har 27 000 tilsette, i hovudsak i Noreg og Tyskland. Selskapet driv med både aluminiumproduksjon og vidareforedling av aluminium. Arbeidet inkluderer både valsing, ekstrudering og støypte komponentar.
[endre] Anna verksemd
Avdelinga for «Andre virksomheter» er definert å liggja utanfor Hydro sine to kjerneområde. Her ligg aktivitetar som Hydro Polymers (petrokjemi), fiskeforprodusenten Biomar, Hydro Business Partner og skadeforsikringsselskapet Industriforsikring.
