Egersund
Frå Wikipedia – det frie oppslagsverket
Utsikt frå Varberg.
Egersund er ein by på det norske Sørvestlandet, i Rogaland fylke, med 9 528 inbyggjarar (2006). Egersund vart ladestad 1798, og frå 1965 er han sentralstad i Eigersund kommune.
Byen var før kjend for fajansefabrikken Egersunds fayancefabrik, som vart etablert i 1847 og lagd ned 1979. Byen ligg ved sjøen og har mykje verksemd knytt til hamna, mellom anna fiskeri, og dei siste tiåra har verksemd knytt til oljeutvinninga i Nordsjøen vorte ein viktig del av næringslivet.
Egersund har ein jarnvegsstasjon, slik er byen knytt til Jærbanen og Sørlandsbanen.
Innhaldsliste |
[endre] Okka by
På folkemunne vert Egersund kalla "Okka by". Nemninga kjem av at det lokale talemålet merkjer seg ut med at ein seier "okka" i staden for "vår". "Okka by" tyder altså "vår by". "Okke" kjem i staden for "oss". Kommunen brukar nokre gonger slagordet "Okka by e dokka by" ("vår by er dykkar by").
[endre] Namna Egersund og Eigersund
Namna "Eigersund" og "Egersund" tek utgangspunkt i det norrøne / gamalnorske namnet "Eikundarsund". "Eikund" tyder "øya som er rik på eik", altså Eigerøy. Endinga "sund" syner til skipsleia mellom fastlandet og øya. Området har hatt mykje eikeskog, og eit eikeblad har og vorte vald som kommunevåpen.
[endre] Egersund i Dalane
Egersund ligg i Dalane- regionen sør i Rogaland, sør for Jæren. På mange vis er Egersund by ein slags "hovudstad" i Dalane. Dalane omfattar kommunane Bjerkreim, Eigersund, Lund og Sokndal. Avisa Dalane Tidende har hovudkontoret sitt i Egersund. Dalane folkemuseum har to avdelinger i Egersund. Ei avdeling er Egersund Fayancemuseum, medan hovudutstillinga er eit folkemuseum.
[endre] Meir informasjon
For litteratur og nettlenker, sjå under artikkelen om Eigersund kommune.
