Bokfink
Frå Wikipedia – det frie oppslagsverket
Bokfinken (Fringilla coelebs) er ein fugl i finkefamilien. Han er om lag 15 cm lang, og veg rundt 20 gram.
Bokfinken har to tydelege kvite vingeband, og issen og nakken er blågrå. Dei ytste stjertfjøra er kvite, og andletet og brystet er brunraudt. Hoa har ei mørk, grøngrå overside, men på undersida er ho ljosare.
Om hausten dreg dei fleste fuglane sør- eller vestover. Dei kjem att i mars–april, og då kjem hannen eit par veker før hoa. Bokfinken har difor fått det latinske namnet «coelebs» som tyder ugift. Når hoa kjem, jagar hannen sint alle rivalane sine vekk i frå området sitt.
Bokfinken hekkar på same stedet kvart år. Reiret vert bygt i tre og ser ut som ei djup skål som er pynta med mose og lav. Bokfinken hekkar i april–juli og han legg tre til seks egg. Rugetida er 13 dagar, og ungane forlèt reiret etter 13–14 dagar. Bokfinken kan få to kull om året.
Bokfinken er ein av dei vanlegaste fuglane i Noreg.
