Skye
From Wikipedia
Skye (gäälsch Eilean Sgitheanach oder ok Eilean à Cheo) is dat gröttste Eiland vun de Binneren Hebriden, de vör de Westküst vun Schottland in’n Atlantik liggt.
Inholtsverteken |
[Ännern] Geografie
Skye hett tosamen mit de lütteren Eilannen in de Neeg en Flach vun 1736 Quadratkilometers, en Läng vun 80 Kilometers un en Breed vun 35 Kilometers. Vun’t schottsche Hööftland is Skye dör den Sund vun Sleat, Kyle Rhea un Kyle Akin oder Loch Alsh trennt, de Lütte Minch billt de Grenz to de Büteren Hebriden. De Oostküst sünd Rona, Raasay, Scalpay un Pabay vörlagert, in’n Süden liggt, trennt dör den Soay-Sund dat Eiland Soay. De Küst vun’t Eiland hett temlich vele Buchten un Sealochs, so dat keen Punkt op dat Eiland wieder as acht Kilometers vun’t Över vun de See weg is. De Buchten deelt Skye in fief gröttere Halvinseln: Sleat in’n Süden, Minginish in’n Süüdwesten, Duirinish in’n Noordwesten, Waternish in’n Noordnoordwesten un Trotternish in’n Noorden. De hööchste Punkt in en bargig Rebeet is de Sgurr Alasdair (993 m över NN) in de rugen Black Cuillins, un dormit ok de hööchste Punkt vun de helen Hebriden.
[Ännern] Verwaltensdelen
Hööftstadt vun dat Eiland is Portree. De Distrikt Skye un Lochalsh is een vun de acht Verwaltenseenheiten vun dat Highland. Dat Eiland sülvst warrt in söven Gemenen indeelt:
- Bracadale 377 km²
- Duirinish 324 km²
- Kilmuir 139 km²
- Portree 230 km²
- Sleat 168 km²
- Snizort 216 km²
- Strath 282 km²
[Ännern] Inwahners
Skye hett na den Zensus vun 2001 8.748 Inwahners.
[Ännern] Weertschop un Verkehr
[Ännern] Verkehr
En Verbinnen to’t faste Land besteiht över de Skye-Brüch na Kyle of Lochalsh oder mit Fähren vun Mallaig na Armadale (blots in’n Sommer) un vun Kylerhea na Glenelg. Ok gaht Fähren vun Uig na Tarbert op Harris un na Lochmaddy op North Uist un vun Sconser na Inverarish op Raasay. Na Inverness un Glasgow fohrt Bussen. Vun den Bahnhoff an de Skye-Brüch in Kyle of Lochalsh geiht Töög na Inverness. De Öörd op dat Eiland sünd dör de Straat A 87 verbunnen.
[Ännern] Sleat
De Süden warrt as de „Goorn vun Skye“ betekent. De fröhere Sitt vun den Klan MacDonald, dat Slott Armadale, is hüüt blots noch en Ruin ahn Dack. Blangen de Ruin liggt en Besökerzenrum dat över de Historie vun den Klan Utkunft gifft. Dorto höört ok en oolt Park mit amerikaansche Boomriesen, de dör dat mille Golfstroom-Klima good wasst. In disse Gemeen liggt ok dat Sabhal Mòr Ostaig, dat gäälsche Kolleg, dat to de Universität vun de Highlands un Eilannen höört.
[Ännern] Duirinish
Över Loch Dunvegan liggt dat Slott Dunvegan, Stammsitt vun den Klan MacLeod siet över 800 Johren. Nerrn vun dat Slott warrt Boottörns to de Robbenfelsen anbaden.
[Ännern] Minginish
Minginish is de Heimat vun de Black Cuillins, de hööchste Bargkeed op Skye, de alle Farvtöön vun gries bet deepswart opwiest. De hööchste Barg is de Sgurr Alasdair (993 m över NN), mit beste Utsicht op de Keed vun’t Fischerdörp Elgol. Vun Elgol ut sünd Boottörns to de Cuillins mööglich. In Carborst liggt de Destille Talisker, de eenzige Brenneree för Single-Malt-Whisky op Skye. Hier lagert ok de Whisky Johnnie Walker, den dat blots noch as Hannelsmark gifft.
[Ännern] Trotternish
De Halvinsel in’n Noordoosten gillt as de schöönste vun Skye. To de Attrakschonen höört to’n Bispeel The Old Man of Storr, en so wat 50 Meters hoge Felsennadel. Kilt Rock, en poor Kilometers in’n Noorden, is en geern besöökt Utsichtspunkt. In dat Museum vun’t Leven op dat Eiland in Staffin warrt wiest, woans de Minschen op Skye leevt. Op den Karkhoff vun Kilmuir liggt dat Graff vun Flora MacDonald, en histoorsche Figur vun Skye. Uig is as Fährhaven Utgangspunkt vun de Fähr vun Caledonian MacBrayne to de Büteren Hebriden.
[Ännern] Weblenken
- Över den Klan MacLeod (hoochdüütsch)
Koordinaten: 57° 19′ N, 6° 14′ W
