Atomtall
From Wikipedia
De Atomtall gifft in de Chemie un in de Atomphysik an woveel Protonen sik in en Atomkarn tosamfinnt. As de Protonen positiv opladt sünd, warrt dorto ok Karnladungstall seggt. De Protonentall in den Karn is normalerwies glieks groot as de Elektronentall in de Hüll, as en Atom no buten jo neutral is. Afkört warrt de Tall mit dat Symbol Z schreven.
Atomen mit de glieke Atomtall höört to dat glieke chemisch Element und verhöllt sik bi chemische Reaktschoonen op de glieke Oort un Wies. De Atomtall warrt deswegen ok för dat Inornen in dat Periodensystem bruukt. Wenn dat nipp un nau maakt warrn schall, warrt de Atomtall links ünnen blangen dat Symbol von en Element schreven, t. B.: 6C (Kohlenstoff). Man normalerwies warrt dat weglaten, as dat Element sülbst jo eendüüdig mit een Atomtall tohopenhangt.
Atomen, de twar gliek sünd von de Atomtall, man ünnerscheedliche Massentallen hebbt, warrt as Isotopen betekend. De Ünnerscheed kummt dorvon, dat nich jümmers glieks veel Neutronen in den Atomkarn binnen sünd. De Neutronentall kann man ganz licht utrekent warrn, indem man die Atomtall von de Massentall aftreckt. De Massentall warrt üblicherwies links baven blangen dat Symbol schreven, t. B.: 12C (Kohlenstoff).
