ഇ.എം.എസ്. നമ്പൂതിരിപ്പാട്
വിക്കിപീഡിയ, ഒരു സ്വതന്ത്ര വിജ്ഞാനകോശം.
ഏലംകുളം മനക്കല് ശങ്കരന് നമ്പൂതിരിപ്പാട് അഥവാ ഇ. എം. എസ്. നമ്പൂതിരിപ്പാട്( ജനനം. ജൂണ് 13, 1909, പെരിന്തല്മണ്ണ)കേരളത്തിന്റെ ആദ്യത്തെ കമ്മ്യൂണിസ്റ്റ് മുഖ്യമന്ത്രി. ചരിത്രകാരന്, മാര്ക്സിസ്റ്റ് തത്ത്വശാസ്ത്രജ്ഞന്, സമൂഹിക പരിഷ്ക്കര്ത്താവ് എന്നീ നിലകളില് പ്രശസ്തനായ അദ്ദേഹം ആധുനിക കേരളത്തിന്റെ ശില്പികളില് പ്രധാനിയാണ്.
യാഥാസ്ഥിതിക നമ്പൂതിരി കുടുംബത്തില് ജനിച്ച ശങ്കരന് നമ്പൂതിരിപ്പാട് സ്വന്തം സമുദായത്തിലെ ദുരാചാരങ്ങള്ക്കെതിരായ പോരാട്ടത്തിലൂടെയാണ് പൊതുരംഗത്തെത്തിയത്. ജന്മനാടായ ഏലംകുളത്തുതന്നെ പ്രാഥമിക വിദ്യാഭ്യാസം നടത്തിയ അദ്ദേഹം പാലക്കാട് ഗവ. വിക്ടോറിയ കോളജിലും തൃശൂര് സെന്റ് തോമസ് കോളജിലുമായി ബിരുദ പഠനം പൂര്ത്തിയാക്കി. വി ടി ഭട്ടതിരിപ്പാടിന്റെ നേതൃത്വത്തില് നമ്പൂതിരി സമുദായത്തിനുള്ളില് തുടങ്ങിയ പരിഷ്കരണ ശ്രമങ്ങളില് ഇ എം എസും പങ്കാളിയായി. പുരോഗമന ചിന്താഗതിയുള്ള നമ്പൂതിരി സമുദായാംഗങ്ങളുടെ കൂട്ടായ്മയായ യോഗക്ഷേമ സഭയുടെ ഭാരവാഹികളിലൊരാളായിരുന്നു അദ്ദേഹം. കോളജ് പഠനകാലത്ത് ഇന്ത്യന് നാഷണല് കോണ്ഗ്രസിലും ഇന്ത്യന് സ്വാതന്ത്ര്യ സമര പ്രസ്ഥാനത്തിലും സജീവമായി പങ്കേടുത്തു. 1931ലെ നിസ്സഹകരണ പ്രസ്ഥാനത്തില് പങ്കെടുത്തു. തൊട്ടടുത്തവര്ഷം പൌരാവകാശ ലംഘനം ആരോപിച്ച് ബ്രിട്ടീഷുകാര് ജയിലിലടച്ചു. ഇന്ത്യന് നാഷണല് കോണ്ഗ്രസിലെ സോഷ്യലിസ്റ്റ് ചിന്താഗതിക്കാര്ക്കൊപ്പമായിരുന്നു ഇ എം എസിന്റെ പ്രവര്ത്തനം.
രാഷ്ട്രീയ ജീവിതത്തിന്റെ തുടക്കത്തില്ത്തന്നെ നേതൃപാടവം പ്രകടമാക്കിയ ഇ എം എസ് 1934-36ല് അഖിലേന്ത്യാ കോണ്ഗ്രസ് കമ്മിറ്റി അംഗമായി പ്രവര്ത്തിച്ചു. 1934, 38, 40 വര്ഷങ്ങളില് കെ.പി.സി.സിയുടെ സെക്രട്ടറിയായിരുന്നു. കോണ്ഗ്രസിലെ സോഷ്യലിസ്റ്റ് ചിന്താഗതിക്കാര് കമ്മ്യൂണിസ്റ്റ് പാര്ട്ടിയെപ്പറ്റി ആലോചിക്കുമ്പോള്തന്നെ ഇ എം എസ് ആ ചിന്താധാരയ്കൊപ്പം നിന്നു. അങ്ങനെ 1937-ല് കമ്മ്യൂണിസ്റ്റ് പാര്ട്ടിയുടെ സ്ഥാപക നേതാക്കളില് ഒരാളായി. 1951 വരെ ഒളിവിലായിരുന്നു പാര്ട്ടിപ്രവര്ത്തനം.
കേരളത്തിലെ മുഖ്യമന്ത്രിമാര് |
---|
ഇ എം എസ് നമ്പൂതിരിപ്പാട് • പട്ടം താണുപിള്ള • ആര് ശങ്കര് • സി.അച്യുതമേനോന് • കെ കരുണാകരന് • ഏ കെ ആന്റണി • പി.കെ.വാസുദേവന് നായര് • സി.എച്ച്. മുഹമ്മദ്കോയ • ഇ.കെ.നയനാര് • ഉമ്മന് ചാണ്ടി • വി.എസ്. അച്യുതാനന്ദന് |