Maarten
Van Wikipedia
- Dit artikel is gesjreve in 't Valkebergs. 't Weurt gewaardeerd óm in dit artikel woe meugelik 't Valkebergs aan te hawte.
Sint Maarten, Sintermeerte of Martinus ies 'ne heilige oet de 4e ièw. In Nederland en Belsj ies hae populair vanwege 'n volks- of kingerfiès, dat gehoute weurt op ziene sjterfdaag 11 november. In zien leve waor hae biesjop van Tours (Frankriek).
In Gäöl, Viele en Houthem bevinge ziech kèrke gewiejd aan Sint Maarten. In Houthem haet de sjötterie en in Viele haet de harmonie häöm es petroanheilige.
Veurname, die aafgeleid zin van deze heilige: Martin, Teng, Mart, Maarten, Tinus (veur jónges) en Maartje, Martine, Tien, Tiny (veur maedsjes)
Inhawd |
[bewirk] Leve en legende
Sint Maarten weurt rónd 't jaor 316 gebore in Sabaria (Hongarije) es zoon van Romeinse ouwersj. Es 15 jaorige geit 'r in 't leger en vertrèk riechting Gallië. Ónderweeg, bie de sjtadspoort van Amiens (Frankriek), tref 'r 'ne bedelaer aan wae hae de hèlf van zien cape geuf. De ganse jas kènt 'r neet sjinke, want de ander hèlf van de jas ies eigendóm van Roame.
- Volges ein legende waor de bedelaer 'n versjiening of symbool van Jezus. Martinus lièt ziech bekière en geit oet 't leger.
- 'n Ander legende vertèlt dat'r ziech al op zien tiende jaor leet duipe tege de wil van zien ouwersj.
Es hae 19 ies weurt 'r duveloetdriever. 'n Tiedsje laef 'r es kloezenaer op 't eiland Gallinaria bie Genua en bie Poitiers in (Frankriek) sjtiech 'r 'n kloaster.
In 371 weurt Martinus tot biesjop van Tours gekoze. Umdat hae ziech neet waerdig genoeg veult veur diet ambt, versjtop 'r ziech in 'n gauzehok. Es de luuj nao häöm goon zeuke, beginne de gauze es wille te sjpektakele en zoa weurt de sjoelplek gevónge en weurt 'r toch tot biesjop gewiejd.
Es biesjop zèt 'r ziech in veur de versjpreiing van 't Christendom. Hae sjtiech kèrke en rónd 375 de abdij van Marmoutier. In 397 sjtörf Martinus, 80 jaor oud. Op 11 november weurt 'r begrave in de basiliek van Tours.
Martinus haet ouch 'n paar wóndere verriech.
[bewirk] Attribute
Martinus weurt aafgebeeld es 'ne Romein in harnas. Daobie geuf 'r de hèlf van zien cape aan 'ne bedelaer. Ouch weurt 'r veurgesjtèld es 'ne biesjop mèt 'ne bedelaer aan zien veut. Gauze of zjwane weure dèks bie häöm aafgebeeld.
[bewirk] Sint Maartensfiès
Op 11 november trèkke euveral in Limburg fakkeloptochte en weure d'r Sint Maartensvure óntsjtoke.
[bewirk] Kingerversjke
Sinter Meertes veugelke
Haet ’n knal road keugelke (petsjke)
En ’n blauw sjteertsje
Hoepsa Sinter Meerte
