Paul Cézanne
Vu Wikipedia, der fräier Enzyklopedie.
De Paul Cézanne, gebuer den 19. Januar 1839 zu Aix-en-Provence, an do gestuerwen den 22. Oktober 1906 war e franséische Moler.
[Änneren] Originnen
Säin Numm weist op dat italienescht Duerf Cesana an der Regioun Piemont an Norditalien. Ëm d'Mëtt vum 17. Joerhonnert hi sech aus der Géigend vu ronderëm Turin en etlech Leit aus dem Po-Flaachland op de Wee gemaach fir a Frankräich. Zu Briançon, net wäit vun der italienischer Grenz, hu si sech néiergelooss an hiren Nimm e franséische Cachet ginn, "Césane" oder "Cézanne". Ee vun hinnen, de "Louis Auguste Cézanne" huet eng Huttfabrik gegrënnt an hat domat grousse finanzielle Succès. 1848 sollt e mat engem Bekannten eng Bank iwwerhuelen, déi Faillite gaange war, an domat zu engem zu engem räiche Mann ginn.
Aus enger Relatioun baussent sengem Bestietnes entstaamt 1839 de Paul an 1841 dat klengt Marie, mat deenen hirer Mamm sech de de Louis Auguste awer eréischt 1844 bestuet huet, nodeems hien d'Kanner unerkannt hat.
[Änneren] Dem Paul Cézanne säi Liewen
De Paul Cézanne huet seng Kandheet zu Aix-en-Provence verbruecht. No e puer Joer an engem Pensionat goung en 1852 an de "Collège Bourbon". De Paul war e fläissege Schüler, mee hie war vu Klengem un e wibbelegt a sturazegt Kand, dat seng Ausgeloossenheet och am Alter ni an de Grëff krut.
Am beschten ass de Paul eens gi mam ee Joer méi jonken Émile Zola, deen op der selwechter Schoul war. Zesumme si se munneg Moler besiche gaangen, déi an der Provence gelieft hunn. Nom Collège geet den Cézanne 1859 a Coursen an d'École des Beaux-Arts a senger Heemechtsstad. De Zola war 1858 mat senger Mamm op Paräis geplënnert, nodeems en dem Cézanne gefléift hat, nozekommen. Deen huet awer säin éischt Joer Droit fäerdeg gemaach.
