Jacques Clément

Vu Wikipedia, der fräier Enzyklopedie.

De Jacques Clément (*1567 zu Serbonnes, †1589 zu Saint-Cloud) wor de Jong vu Baueren aus der Champagne an ass am Gediechtnis vun de Leit als Märder vum Henri III. bliwwen.

1589 war hien ee vun de jonke Reliéise vum Dominikanerklouschter vun der Rue Saint-Jacques zu Paräis. Mat Bréiwer fir de Kinnek vum Grof vu Brienne deen am Louvre agespaart war, ass hien aus der Stad eraus bei d'royalistesch Truppe gaangen, déi Paräis belagert haten. Hie gouf zu Vanves ënnerbruecht a krut eng Audienz beim Kinnek den 1. August 1589. Hien hat behaapt, hien hätt geheim Informatiounen iwwert eng méiglech Ënnerstëtzung fir de Kinnek a Paräis. Dës Informatioune kéint hien awer nëmmen dem Kinnek ginn, a sou huet den Henri III. d'Gentilhommen aus dem Zëmmer gelooss a wor mam Clément alleng. Knapps wor hie mam Kinnek alleng, huet hien e mat engem Messer erstach, a gouf kuerz drop selwer vun de Gentilhommen, déi nees an d'Zëmmer gerannt waren, ëmbruecht. Säi Kierper gouf doropshi verbannt, fir datt keen op d'Iddi kéim, e Reliquiekult unzefänken.

De Regizid léisst sech einfach verstoen, wann een sech d'Stëmmung zu Paräis ukuckt. De Kinnek war als Tyrann deklaréiert ginn, a war exkommunizéiert. Nodeems d'Nouvelle bekannt gi war, gouf sech zu Paräis doriwwer immens gefreet. D'Kathoulesch Liga huet drop gehalen, dass de Clément ënner gëttlechem Afloss gehandelt hat, an domadder e Märtyrer wir.