Ari Magnússon
Úr Wikipediu, frjálsa alfræðiritinu
Ari Magnússon (1571 – 11. október 1652) var sýslumaður á Vestfjörðum og bjó í Ögri við Ísafjarðardjúp og er oftast kenndur við þann stað. Foreldrar hans voru Magnús „prúði“ Jónsson, sýslumaður í Bæ á Rauðasandi, og kona hans, Ragnheiður Eggertsdóttir, lögmanns, Hannessonar. Ari átti nána frændur í móðurætt í Hamborg og var þar ungur að námi, jafnvel allt að áratug. Hann mun því hafa verið mjög vel menntaður á síns tíma vísu. Ari var fyrst sýslumaður í Barðastrandarsýslu, en síðar í Ísafjarðarsýslu og Strandasýslu. Hann var einnig umboðsmaður konungsjarða í Ísafjarðarsýslu og mun því hafa verið mjög valdamikill maður. Ari er þekktur enn þann dag í dag fyrir Spánverjavígin svokölluðu, en hann lét elta uppi og drepa baskneska fiskimenn hvar sem til þeirra náðist á Vestfjörðum. Hafði konungur fellt þann úrskurð að þeir væru réttdræpir, en alltaf hafa þessi víg þótt heldur nöturleg í Íslandssögunni. Kona Ara var Kristín Guðbrandsdóttir, biskups á Hólum, Þorlákssonar.