Prión

Na Galipedia, a wikipedia en galego.

prión O termo prión quere dicir "partícula infecciosa constituída unicamente por proteínas", e está formado por proteína + infecciosa + -ón, sufixo usado para formar nomes de partículas (electrón, protón, neutrón, etc.). Estas partículas están formadas en gran parte por glicoproteínas (proteínas asociadas a un glícido ou azucre) de masa molecular moi pequena, aproximadamente 30 000, e non conteñen material xenético (ADN ou ARN) pero, pese a iso, son capaces de replicárense inducindo a transformación das proteínas normais do organismo infectado por elas en copias de si mesmas. Son, pois, formas acelulares aínda máis pequenas e simples que os virus e que outras formas non celulares descubertas recentemente, como os viroides, que constitúen un grupo totalmente novo de axentes infecciosos, descoñecéndose aínda o mecanismo mediante o que conseguen que as proteínas do organismo hospedeiro se transformen en novos prións. Os prións son os responsábeis de doenzas tales como a enfermidade de Creutzfedl-Jacob ou a encefalopatía espoxiforme bovina (coñecida popularmente como o mal das vacas tolas), entre outras, todas elas caracterizadas por unha dexeneración progresiva do sistema nervioso central que frecuentemente remata coa transformación do córtex cerebral unha especie de masa esponxosa, e que conduce á demencia e, en pouco tempo, á morte. Estas enfermidades son transmisibles, ao parecer, por comer tecido nervioso de animais enfermos. Hai uns anos pensábase que os axentes causantes delas eran virus dos chamados "lentos", pero os intentos realizados para illar estes virus foron infructuosos. Hoxe sábese que son debidas aos prións.