Leporo
El Vikipedio
Zoologio > Mamuloj - Leporo - Vestado - Felo
Leporo (Lepus europaeus) estas reprezentanto de la ordo de leporuloj (Lagomorpha) kaj subfamilio de leporedoj (Leporidae). Ĝi estas mamulo kun longaj oreloj kaj longaj postaj kruroj (tiuj kruroj estas pli longaj ol tiu de la kuniklo), pro kio li povas rapide saltkuri; ĝia hararo (felo) estas rustkolore ĝis kaŝtankolore bruna, multnuanca laŭ la medio, sed ventre blanketa. Ĝi longas maks. 75 cm, ŝultroaltas maks 30 cm kaj pezas maks. 7-8 kg. Ĝi vivas en Mez-, Sud-Eŭropo, Okcidenta Azio.
Leporino estas graveda 42 tagojn kaj poste ŝi naskas 2 ĝis 5 leporidojn, kiuj estas felhavaj kaj tuj vidas. Ili kuŝas en kaŝita seka loko, sed jam post kelkaj tagoj kuraĝas fari nelongajn esplorajn ekspediciojn en la ĉirkaŭaĵo. La patrino lasas ilin solaj kaj revenas nur por mamnutri ilin. Ekster pariĝo la leporoj vivas izole. La femalo naskas trifoje aŭ kvarfoje en jaro.
Leporoj manĝas sukajn plantojn, vintre ili ronĝas arboŝelon, tiel damaĝante fruktoarbojn, arbojn; tial oni ĉasas ilin.
Leporo estas simbolo de rapideco (forlepori = rapide forkuri) kaj temo de proverboj (pafi samtempe du leporojn; kiu ĉasas du leporojn, kaptas neniun; fortoj leporaj kaj kapricoj sinjoraj).
Tegmentleporo estas ŝerca nomo por migra kato.
Leporaĵo estas ŝatata manĝaĵo.
