Joseph Brodsky
De Uiquipedia
Joseph Brodsky (Иосиф Александрович Бродский), poeta rusu, nacionalizau estaunidense, nació el 24 de mayu de 1940 y morrió el 28 de xineru de 1996. Recebió el Premiu Nobel de Lliteratura en 1987.
[editar] Biografía
- "и жизнь течет, как текила" (Y la vida fluxe como tequila)
Brodsky pasó la infancia y mocedá en Leningráu (güei San Petersburgu), nun pisu compartíu colos pás (el pá yera un fotógrafu d'orixen xudíu, la má yera rusa) y otres families; de fechu, esto reducía'l pisu de los Brodsky a un cuartu, como el poeta desplicara nún artículu del so llibru Less than one (Menos que ún, 1986). Depués del outavu cursu, a los 15 años, Brodsky dexó l'escuela y entamó a trabayar. Ente los sos llugares de llabor cuéntense un hospital, una morgue y una espedición xeolóxica. Enfotáu pol conseyu positivu de la poeta Anna Ah.matova y pol so interés nes artes, Brodsky adicaba to'l tiempu a la lletura y la escrita.
En 1963, foi xulgau pol cargu de "parasitismu pala sociedá" ("тунеядство"). Les aztes del xuiciu, espublizaes años depués, tan enllenes de situaciones que al lletor-y sedríen cómiques si nun foren reales, imaxes de la represión nel sistema soviéticu:
Xuez: ¿En qué trabayes?
Brodsky: Escribo poemes. Faigo tornes. Creyo...
Xuez: Nun queremos les tos creyencies...
...
Xuez: Nun mos interesen les tos creyencies. Respuéndeme, ¿por qué nun trabayabes?
Brodsky: Trabayaba. Escrebía poemes.
Xuez: Eso nun mos interesa...
...
Xuez: ¿Quién te dixo que yeres poeta? ¿Quién te diera el llugar de poeta? ¿Ficiste un cursu de poesía nuna istitución? ¿Preparástete na universidá pa deprender a escrebila?
Brodsky: Nun creyo que la poesía se deprenda.
Xuez: Bon, ¿d'ú vien entós?
Brodsky: Creyo que vien de Dios.
...
Xuez: Va ser meyor que nos despliques como puen andechar les tos contribuciones al gran camín allantre del Comunismu...
Brodsky: Costruyir el comunismu nun ye sole trabayar nún tornu o col aráu nel campu. Tamién hai un trabayu del espíritu, y...
Xuez: ¡Otra güelta! ¡Nun entames con frases inflaes! Prestaríanos oyir su la to vida trabayaora nel futuru.
Brodsky: Petecíame escrebir poemes y facer tornes. Poro si eso ye escontrario a les normes sociales, atoparé un trabayu y caltendré la poesía.
Abogáu Tiagli: Tol mundu trabaya n'esta sociedá. ¿Cómo dibes pasate tou esi tiempu ensín facer ná?
Foi condenau a cincu años nún campu de trabayos forzaos na fastera de Arh.angelsk, pero tuvo ellí namás que 18 meses, gracies a les protestes de dellos inteletuales soviéticos y d'otros países, como'l mesmu Jean Paul Sartre. Los sos problemes políticos, por embargu, nun terminaran entovía, ya que'l 4 de xunu de 1972 foi desiliáu. Caleyó por dellos países de Europa fasta que escoyó dir a los Estaos Xuníos, onde atopó el padrinazgu del poeta W.H. Auden y un puestu de profesor na Universidá de Mount Holyoke. En 1977 nacionalizóse estaunidense.
Morrió en Nueva York, (EEUU), magar que lu sotierraron nel cemeteriu de Isola di San Michele, Venecia, la ciudá na que tuvo vivío munchos iviernos y a la que-y dedicara el llibru en prosa Watermark (Marca d'agua, 1992).