Donald Knuth
De Uiquipedia
Donald Ervin Knuth (nacíu'l 10 de xineru, 1938) ye un informáticu perconocíu y profesor eméritu na Universidá de Stanford.
Un de los trabayos meyor conocíos de Knuth ye la coleición de llibros "L'arte de la programación d'ordenadores" (The Art of Computer Programming o TAOCP), una de les obres más respetaes na informática. Ye un trabayu señeru nel desendolcu del análisis de algoritmos, y fizo delles contribuciones básiques a delles estayes de la informática. Nun ordre más práuticu, tamién ye l'autor de TEX, un programa de edición y composición de documentos, y de METAFONT, un sistema de diseñu de fontes (tipos de lletra). Tamién ye ún de los pioneros de la literate programming.
[editar] Educación y trabayu académicu
Nacíu'n Milwaukee, Wisconsin, titulóse'n matemátiques en 1960, y doctoróse tamién en matemátiques en 1963 nel California Institute of Technology (Institutu de Teunoloxía de California), onde entamó a trabayar de profesor y tamién a escribir The Art of Computer Programming. En principiu, pensaba que esta serie diba tener 7 volúmenes. Espublizó'l primeru'n 1968. Esi mesmu añu marchó a trabayar pa la Universidá de Stanford.
En 1971, Knuth foi el primeru'n recibir el premiu Grace Murray Hopper de la ACM. Ganó dellos otros premios, ente ellos el Premiu A. M. Turing, la Medalla Nacional de la Cencia, la Medalla John von Neumann y el Premiu Kyoto. Dempués de sacar el tercer volumen de la so serie TAOCP en 1976, abultó-y tan frustrante la situación de les ferramientes de composición de llibros que púnxose a trabayar nos sistemas TEX y METAFONT.
En 1992 retiróse de la docencia y la vistigación en Stanford pa terminar The Art of Computer Programming. Ta trabayando (2004) nel cuartu volume, y mentantu lu termina, da leiciones informales delles veces ca añu en Stanford, que llama Computer Musings (Meditaciones sobre informática).
[editar] Curiosidaes
Amás de les sos contribuciones científiques, pa encuadrar a Knuth ye necesario conocer delles de les sos escentricidáes, porque ye una persona con gran sentíu del humor (orientáu, de cutio, a la informática).
- Paga 2,56 dólares a quien atope errates nos sos llibros y programas (porque diz que 256 céntimos son un dólar hexadecimal).
- Los númberos de versión del so programa TEX nun son enteros correllativos, sinon que son aprosimaciones al númberu π (tienen la forma 3, 3.1, 3.14...) Esto fai que'l númberu seya ca vez mayor, pero non lu asusta, porque ta tan enfotáu en que el programa ta estable y ensin fallos que nun van salir munches versiones más.
- Dixo una vegada nun escritu: "Curiáu colos fallos nel programa d'equí enriba; namái demostré que yera correutu, nun lu probé".
- Tolos apéndices na so serie de llibros Computers and Typesetting tienen un títulu qu'entama con la mesma lletra que identifica l'apéndiz.
[editar] Enllaces esternos
- La páxina de Knuth en Stanford (n'inglés)
- Biografía llarga de Knuth (n'inglés)
- Vídeos de presentaciones nas que sal Donald Knuth (n'inglés)