Molekule
vanuit Wikipedia, die vrye ensiklopedie.
'n Molekule is die kleinste partikel van 'n suiwer chemiese verbinding wat steeds sy chemiese samestelling en eienskappe kan behou. 'n Molekule bestaan uit meer as een atoom wat aanmekaar gebind is deur gedeelde elektrone in 'n kovalente verbinding. Dit mag betsaan uit atome van dieselfde chemiese element, soos in suurstofgas (O2), of uit atome van verskillende elemente, soos in water (H2O).
'n Stof wat uit molekules bestaan word 'n molekulêre stof genoem.
Die meeste molekules is te klein om met die blote oog waar te neem, maar daar is uitsonderings. 'n Voorbeeld van 'n makroskopiese grootte molekule is DNA, wat 'n makromolekule genoem word.
'n Eienskap van molekules is die heelgetalverhouding van die elemente wat die verbinding uitmaak, ook genoem die empiriese formule. As voorbeeld bestaan water altyd uit 'n 2:1 verhouding van waterstof tot suurstof, en etielalkohol of etanol altyd uit koolstof, waterstof en suurstof in 'n 2:6:1 verhouding. Die verhouding bepaal egter nie die uniekheid van die molekule nie – dimetiel eter het byvoorbeeld dieselfde elementverhouding as etanol. Molekules met dieselfde aantal atome in verskillende rangskikkings word isomere genoem.
Die chemiese formule reflekteer die presiese aantal atome waaruit 'n molekule bestaan. Die molekulêre massa word bereken vanuit die chemiese formule en word volgens konvensie uitgedruk in eenhede wat gelykstaande is aan 'n 1/12 van die massa van die 12C isotoop atoom.
Molekules het vaste meetkundige ewewigte – verbindinglengtes en hoeke – wat bepaal word deur die wette van kwantum meganika. 'n Suiwer stof bestaan uit molekules met dieselfde meetkundige struktuur. Die chemiese formule en die struktuur van 'n molekule is die twee belangrike faktore wat sy eienskappe bepaal, in in besonder sy reaktiwiteit. Isomere het dieselfde chemiese formule maar het verskillende eienskappe vanweë hulle verskillende strukture. Stereo-isomere is besondere soort isomere waarvan die fisiese en chemiese eienskappe baie met mekaar kan ooreenstem maar ook baie kan verskil ten opsigte van hul biochemiese aktiwiteite.
[wysig] Verwante artikels
- molekulêre meetkunde
- molekulêre orbitaal
- kovalente verbinding
- polêre molekules
- nie-polêre molekules