Molekul

Ti Wikipédia, énsiklopédi bébas

Molekul nyaéta bagéan pangleutikna tina unsur atawa sanyawa kimia murni nu mibanda sakumpulan sipat-sipat kimiawi jeung fisik nu has. Molekul biasana disusun ku dua atawa leuwih atom nu kabeungkeut jadi hiji, iwal gas mulya nu diwangun ku ukur hiji atom.

Gambar 1. Gambaran 3D (kénca jeung tengah) jeung 2D (katuhu) terpenoid, atisan. Dina modél 3D beulah kénca, atom karbon digambarkeun salaku buleudan abu-abu, buleudan bodas ngagambarkeun atom hidrogén, sedengkeun silinder nunjukkeun beungkeutna. Modél ieu dibungkus ku "jaring" nu ngagambarkeun beungeut molekular, diwarnaan dumasar wewengkon muatan listrik positif (beureum) jeung négatif (bulao).

Kalolobaan molekul leutik teuing mun hayang ditempo bungkeuleukanana ku mata taranjang, tapi aya iwal. Saguruntul uyah, atawa inten dina lélépén, ngarupakeun kisi kristal raksasa, molekul repetitif nu beungkeutan atomna (boh beungkeut ionik atawa kovalén) nyambungkeun sakabéh struktur. Conto séjén molekul makroskopis séjén nyaéta DNA, hiji makromolekul.

Salasahiji sipat molekul nyéta nisbah buleud unsur-unsur nu nyusun sanyawa, nyaéta rumus émpiris. Pikeun conto, dina wujud murnina, cai salawasna diwangun ku hidrogén jeung oksigén dina nisbah 2:1, sedengkeun étil alkohol atawa étanol salawasna diwangun ku karbon, hidrogén, jeung oksigén dina nisbah 2:6:1. Najan kitu, nisbah ieu teu nangtukeun jenis molekul sacara husus - dimétil éter mibanda nisbah nu sarua jeung étanol, misalna. Molekul nu mibanda atom nu sarua dina susunan nu béda disebut isomér.

Rumus kimia dina sisi séjén ngagambarkeun jumlah nu pasti atom-atom nu ngawangun hiji molekul. Beurat molekul diitung tina rumus kimia sarta diéksprésikeun dina unit konvénsional nu sarua jeung 1/12 beurat isotop atom ¹²C.

Tempo ogé: Molekul polar jeung nonpolar.