Ejakulasie

vanuit Wikipedia, die vrye ensiklopedie.

Hierdie artikel bespreek die manlike ejakulasie in die mens. Sien vroulike ejakulasie vir die vroulike ekwivalent.

Ejakulasie is die proses van die uitspuit van semen vanuit die penis. Dit gaan gewoonlik gepaard met 'n orgasme, wat weer teweeggebring word deur seksuele prikkeling. Dit kan egter ook voorkom gedurende die Vinnige Oogbewegingsfase (VOB) van slaap, tesame met 'n ereksie en seksuele drome. Andersins gebeur dit soms tydens massering van die prostaat. In skaars gevalle, mag dit die gevolg van siekte van die prostaat wees.

[wysig] Fisiologie

Ejakulasie is 'n refleksbeweging. As dit eers aan die gang kom, is daar mee geen keer nie. Twee fases van ejakulasie word beskryf: 'n voorwellings- en volwaardige ejakulasiefase. Die voorwellingsfase begin wanneer spermatozoa vanuit die epididymis, waar dit geberg word, deur die twee vasa deferens aangestoot word tot by die ampoule aan die bopunt van hierdie twee buisies. Wanneer die saad dan deur die uitstortingsbuise beweeg en gemeng raak met vloeistowwe, staan dit bekend as semen. Op hierdie tydstip neem die volwaardige ejakulasiefase 'n aanvang en word die semen in ritmiese sametrekkings uitgespuit deur die uretra. Die totale duurte van ejakulasie is omtrent drie tot tien sekondes lank.

[wysig] Statistiese verskille

Die kragtigheid van beweging asook die hoeveelheid van die semen verskil grootliks tussen mans. Die volume mag enigiets wees tussen twee en 15 milliliters, maar die grootste gros manne produseer tussen vyf en sewe milliliter. Die hoeveelheid in 'n individuele man wissel ook by verskillende ejakulasies: dit hang af hoe onlangs die naasvoorlaaste ejakulasie plaasgevind het. As 'n man langer as twee dae laas geëjakuleer het, het die volume van die tweede van twee ejakulasies kort na mekaar 'n groter volume, as wanneer hy korter vantevore geëjakuleer het. Dit kom voor of die volume semen wat geproduseer word, 'n direkte korrelasie het met die intensiteit van die orgasme-ervaring.

Die getal spermatozoa verskil ook baie wyd individueel. Die aanvaarde getal is 20 miljoen spermatozoa per keer, met 'n beweegliksheidspersentasie van 50 persent, en normale spermformaat in 60 persent of meer. Die hoeveelheid spermatozoa hang af van die tydperk wat verloop het sedert die vorige ejakulasie, die hitte binne in die testes, die man se ouderdom, die testosteroonvlak, die algemene vrugbaarheid van die man, asook die graad en lengte van tyd van die seksuele opwinding wat die ejakulasie voorafgegaan het.

Na ejakulasie is dit vir omtrent 'n halfuur onmoontlik vir meeste mans om weer te kan ejakuleer, grootliks omdat hulle nie weer 'n ereksie kan kry tydens hierdie periode nie. Hierdie tydsinterval word die weerstandigheidsperiode genoem. Die glans van die penis is meestal tydens hierdie selfde periode hipersensitief vir aanraking.

Soortgelyk is daar wye variasie in die tyd wat dit neem vanaf die oomblik dat seks begin het, totdat ejakulasie plaasvind. Tydens die aktiewe stootbewegings van seks kan die meeste mans ejakulasie vir nie langer as omtrent vyf minute uitstel nie. 'n Baie klein groepie is in staat om te ejakuleer net wanneer hulle wil, en dis hierdie groep wat aktief seks kan beoefen vir 'n uur of langer.

[wysig] Patologie

Wanneer ejakulasie plaasvind voordat al die persone wat met mekaar tydens daardie geleentheid seks het gereed is daarvoor, word dit premature ejakulasie genoem. Aan die ander kant, as 'n man nie kan ejakuleer ten spyte van voldoende seksuele stimulasie nie, en hy behou sy ereksie gedurende hierdie hele tydperk, word dit anorgasmie genoem. Daar is 'n groot aantal geneesmiddels wat ejakulasie of orgasme kan onderdruk. Die mees bekende hiervan is die antidepressante wat op die neurotransmittor serotonien 'n uitwerking het.