Omega 3
Èn årtike di Wikipedia.
Les Omega 3, k' on scrît co ω 3, c' est ene sôre di crås acide u seur di cråxhe.
Gn a 2 sôres di seurs di cråxhe: les bôrés (saturés) et les nén-bôrés (nén saturés).
Les bôrés dinèt des deurès cråxhes; les nén-borés dinèt des tinrès cråxhes.
Cwand, dins nosse coir gn a dtrop di bôrés acides, les voennes et les arteres s' aroedixhèt et etrinnèt des infarctus et totes les mizeres ki vont avou.
Å contraire, les nén-borés acides atinrixhèt les cråxhes di nosse coir et les rindèt pus moliantes. On dit k' il ont ossu on bon efet so les strindedjes et, did la, sol caractere.
On les rconoxhe:
- al longueur di leu tchinne di carbone ki va par 2, di 4 a 22, ki s' sicrît di C 4 a C 22 et å nombe di loyaedjes sol tchinne: di 0 a 6 , ki s' sicrît : 0 a : 6
- al pôzucion do prumî loyaedje. Les ôtes shuvèt di 3 a 3, ki s' sicrît ω3, ω6, ω9.
Les bôrés n' ont pont d' loyaedjes (0); dins les nén-bôrés, gn a les « mono-insaturés » ki n' ont k' on loyaedje (1) et les « poli-insaturés » k' ont dpus d' on loyaedje.
Les seurs di cråxhe a-z î rwaitî cwand on magne, c' est : Les bôrés-crås, ki sont todi a limiter å possibe. Les nén-bôrés acides, del famile des C18:3 ki sont les meyeus pol santé.
Mins dins les C18 :3, gn a co d' deus sôres:
- Les C18 : 3 ω 6, k' on trove a pô près dins totes les dinrêyes,
- Les C18 : 3 ω 3 , ki sont pus råles et k' on n' trove ki dins les grinnes di lin, di golzå, di tchene, les pexhons, l' ôle di pexhons.
Dins çk' on magne e l' Urope, et co dpus e l' Amerike, on rtrove djusk' a 20 pårts d' ω 6 po 1 pårt d' ω 3, adon k' on dvreut, po bén fé, ariver al muzeure di 4-5 po 1.
I fåt dire ossu ki cwand on rastrind les ω 6, les ω 3 si rafoircixhèt d' zels-minmes. Dabôrd, on wangne des deus costés.
