Gölsem Möxämmädi

From Wikipedia

Ömmegölsem Möxämmädi Daut qızı (Gölsem Möxämmädi'eva) 1903. yılnıñ 19. Sentäberdä Ästerxan şähärendä tuıp, bala çağınnan uq Tatarça qämil tärbiä alğan, soñğa taba medisin institüten tämamlap fännär nämzäte digän ğilmi däräcägä ireşkän Gölsem Möxämmädi ozın ğömer yulı turıdan-turı Ğälimcan İbrahím'ov şäxese häm anıñ ícat biografísı belän bäyle diärgä bula. Ul - klassik ädipneñ berençe xatını wä anıñ taríxí äsärlären Urıs telenä berençe tärcemä itüçe. 1930. yıllardağı repressílardan soñ, ul Qırımda, annan Urta Asíada yäşi häm Qazanğa yänä 1977. yılda ğına qayta. Ğömereneñ yegerme-utız yılın Gölsem tulısınça Ğälimcan İbrahímnıñ tormışın häm ícatın öyränügä, anıñ turında istälekle äsärlär yazuğa bağışlí. Uquçılar tarafınnan cılı qarşı alınğan «Zur tormış» (1968), «Yäşlek könnäre» (1975), «Ezlänülär» (1987), «Olı yul» (1994) isemle istälekle kitaplar änä şul maqsatçıl ícat omtılışınıñ bäräkätle näticäläre bulıp toralar.

1988. yılnıñ 11. Martında Gölsem xanum Qazanda wafat buldı.