Antias Hulandes

Di Wikipedia, e ensiklopedia liber

E artíkulo aki ta skibí na papiamentu. Lo ta apresiá si por mantené e artíkulo aki na estilo di papiamentu.


Bandera	Wapen

Himno: Himno sin título

Kapital Willemstad

Stat mas grandi Willemstad

Idioma(nan) ofisial Hulandes

Forma di gobernashon

- Reina
- Gobernador
- Promé Minister

Demokrasia parlamentario
Monarkia konstitushonal
Reina Beatrix
Frits Goedgedrag
Emily de Jongh-Elhage

País den Reino Hulandes
Statuut 15 desèmber 1954

Area
- Total
- Awa (%) 800 km² (~171)
n/a

Populashon
- 2005 est.
- Densidat 183.000 (185)
229/km² (~34)

Moneda Florin (Gulden) (ANG)

Zona di tempu (UTC-4)

TLD di internet .an

Kódigo pa yama +599

E Antias Hulandes òf Antias Neerlandes (hulandes: Nederlandse Antillen), ta parti di e Antias Menor i ta konsistí di dos grupo di isla den Laman Karibe ku ta forma parti di Reino Hulandes. E ekonomia di e islanan ta depende hopi riba turismo i petroleo.

[editá] Historia

E spañónan a deskubrí i tabata e proménan pa establese nan mes riba e islanan (pa abou: Alonso de Ojeda, 1499; pa ariba: Christoffel Columbus, 1493). Den e siglo 17, e West-Indische Compagnie a konkistá e islanan e a uza nan komo base pa negoshi di katibu. Esaki tabata abolí na aña 1863.

Na aña 1954, e islanan tabata promoví di kolonia pa parti di e Reino di Hulanda komo un estado asosiá. Aruba tabata parti di Antias te ku 1986, ora el a haña "status aparte" i a bira un parti apart den e reino.

[editá] Polítika

E hefe di estado ta e rei òf reina di Hulanda, ku den Antias ta representá pa un gobernador. E gobernador tambe ta na kabes di e gobièrnu lokal, i huntu ku e ministernan ta forma parti di e poder ehekutivo di gobièrnu.

E kurpa legislativo tin dos parti. Delegashonnan di e islanan ta representá den e gobièrnu di Antias, pero kada isla tin su mes gobièrnu insular ku ta goberná riba un base diario.

[editá] Futuro

Den 2004 un komishon di e gobièrnunan di Antias i di Hulanda a reportá riba e futuro di e Antias Hulandes. E komishon a avisá un revishon di e Statuut pa e Reino di Hulanda pa desolvé e Antias Hulandes.

Kòrsou i Sint Maarten lo forma dos estadonan asosiá nobo. Boneiru, Saba i Sint Eustatius lo bira parti di Hulanda komo isla di reino. Riba 28 novèmber, 2005, e gobièrnu hulandes a yega na un akuerdo ku e gobièrnunan di tur e islanan, ku lo hasi tur lokual e komishon a konkluí realidat pa yüli 2007.

[editá] Islanan

E dos grupo di islanan di Antias Hulandes ta:

E islanan pa abou (Benedenwindse Eilanden):
- Boneiru, huntu ku e isla chikitu Klein Bonaire
- Kòrsou, huntu ku e isla chikitu Klein Curaçao
E islanan pa ariba (Bovenwindse Eilanden):
- Saba
- Sint Eustatius
- Sint Maarten, e parti zùit di e isla di San Martin (e parti nort, Saint-Martin, ta franses i ta parti di e departamento ultramar di Guadeloupe).

[editá] Geografia

Mapa di Antias Hulandes

E islanan pa ariba tur ta di orígen volkániko i tin hopi seru, ku no ta laga hopi lugá pa agrikultura. E islanan pa abou ta di orígen mesklá, di volkan i di koral. E punto mas haltu ta Mount Scenery, 862 meter, na Saba. Esaki ta e punto mas haltu den henter Reino Hulandes tambe.

[editá] Ekonomia

Turismo, transportashon di petroleo i refinamentu di zeta (na Kòrsou), i tambe negoshinan "offshore" ta forma gran parti di e ekonomia di e islanan. E islanan tin un bon ganashi per capita i un bon infrastruktura kompará ku otro país den e region. Kasi tur karga (kapital i pa konsumidó) ta importá, gran parti di esaki ta di Venezuela, Merka, Mexico i Hulanda, ku ta provee e islanan ku sen tambe. Tera inadekuado i insufisiente awa ta hasi e desaroyo di agrikultura difisil. E florin antiano tin un balor fihá na e dollar merikano (1,79:1).

[editá] Demografia

Mayoria antiano ta desendiente di kolonistanan europeo i di katibu afrikano ku tabata importá i bendí aki di siglonan 17 pa 19. E sobrá di e populashon a bini di otro isla den Karibe, Amérika latino, ost Asia i di otro parti di mundu.

Papiamentu ta e idioma dominante na Kòrsou i Boneiru (i tambe Aruba). E idioma krioyo aki a forma di hulandes, spañó, ingles i portugues.

Ingles ta e idioma mas komun riba e islanan pa ariba (St. Maarten, Saba i St. Eustatius). Spañó ta birando e di dos idioma riba e islanan pa ariba, mas tantu na St. Maarten.

Maske e idioma ofisial ta hulandes, e gobièrnu antiano ofisialmente ta rekonosé e uzo di ingles i papiamentu. Tambe, maske e legislatura ta na hulandes, diskurso den parlamento ta na ingles òf papiamentu.

Gran parti di e populashon ta kristian, mas tantu katóliko. Kòrsou tambe tin un minoridat hudiu ku ta desendiente di un grupo di hudiu Sefardí ku a bini di Amsterdam i Brazil na aña 1654.

Den e último dékadanan, hopi antiano hóben i eduká a emigrá pa Hulanda, ku ta laga e islanan ku un problema sosial-ekonomiko grandi. Sinembargo, den último añanan, hopi hende di Repúblika Dominikana, Haiti, Karibe anglofóniko i Colombia a imigrá pa Antias.

[editá] Kultura

E orígennan di e populashon i unda e islanan ta situá ta duna Antias un kultura mesklá. Turismo i un presensia dominante di e media merikano a yuda e influensia merikano krese. Mes kos ku otro país den Karibe i Amérika latino, riba tur e islanan, Karnaval ta un evento importante.

[editá] Linknan eksterno

www.gov.an - Portal ofisial di e gobièrnu di Antias Hulandes
Banko Sentral di Antias Hulandes
Antillenhuis - Kabinet di e Gevolmachtigde Minister di Antias na Hulanda

Antias Hulandes
Islanan grandi: Boneiru \| Kòrsou \| Saba \| Sint Eustatius \| Sint Maarten
Islanan chikitu: Klein Bonaire \| Klein Curaçao \| Green Island Reino Hulandes