The Lord of the Rings
Frå Wikipedia – det frie oppslagsverket
The Lord of the Rings, omsett til Ringenes herre på bokmål og Ringdrotten på nynorsk, er eit episk verk i sjangeren fantastisk litteratur, forfatta av J.R.R. Tolkien. Boka er ein oppfylgjar til det tidlegare verket hans, The Hobbit (Hobbiten) og byggjer på bakgrunnsinformasjon frå The Silmarillion (Silmarillion).
The Lord of the Rings byrja med Tolkien si utforsking av filologi, eventyr, samt keltisk og nordisk mytologi.
[endre] Handling
Historia er eit framhald av The Hobbit. Hobbitane vert dregne inn i store hendingar som trugar heile verda etter kvart som den vonde herskaren Sauron prøver å få tilbake herskarringen sin som vil attopprette den fulle styrken hans.
Handlinga i verket går føre seg i Middle-earth, J.R.R. Tolkien sitt oppdikta kontinent, omsett til norsk som Midgard.
[endre] Utgjevingar
The Lord of the Rings vart utgjeven på engelsk frå 1954 til 1955 og er omsett til norsk tre gonger. Første gongen til riksmål - Krigen om Ringen - frå 1971 til 1973, av Nils Werenskjold (titlane på dei tre delbøkene her var De Sorte Rytterne, De To Tårnene og Kongen kommer tilbake). Boka vart omsett for andre gong til bokmål - Ringenes Herre - av Torstein Bugge Høverstad frå 1980 til 1981. I slutten av 2006 vart boka omsett til nynorsk - Ringdrotten - av Eilev Groven Myhren.
Verket er samansett av seks «bøker». Tolkien ville opphavleg gjeva ut heile verket i eitt band, men papirmangelen i etterkrigstida utelukka dette. I staden vart historia delt opp i tre band: The Fellowship of the Ring (på nynorsk Ringens Brorlag, på bokmål Ringens brorskap, inneheld bok I og II), The Two Towers (nynorsk Dei To tårna, bokmål To Tårn, inneheld bok III og IV), og The Return of the King (nynorsk Kongens Atterkome, bokmål Atter en Konge, inneheld bok V og VI, samt seks tillegg og fire oversikter). Dei siste utgåvene er gjennomgått tekstkritisk, og der er det retta opp ein del redaksjonelle feil som var komne med i tidlegare utgåver. Attåt finst det òg to ekstra stamtavler for figurane i forteljinga og mytologien bak.
Fordi dei tre bøkene er så vidt distribuerte, vert ofte The Lord of the Rings omtala som ein trilogi. Dette er imidlertid teknisk gale, ettersom historia var skriven og tenkt på som éi bok, og dei tre delane ikkje kan lesast uavhengig av kvarandre. Tolkien hadde heile tida lyst til å gje det ut som éi bok, men forlaget meinte den ville verte for vanskeleg å selje. Dermed måtte ho delast opp i tre, og verte gjeven passande titlar.
Det er også laga tre filmar av boka, der kvar film tilsvarar eit band. Filmane er regisserte av Peter Jackson.
