Lynni Treekrem
Frå Wikipedia – det frie oppslagsverket
Lynni Treekrem (1958– ) er ein musikar frå Kristiansund på Nordmøre. Ho blir gjerne karakterisert som ein i norsk samanheng glødande og energisk musikar som tør å gå nye vegar.
Lynni Treekrem vart fødd i 1958 i USA, men allereie da ho var 3 år gammal flytte familien til Noreg og busette seg i Kristiansund. Det vart tidleg klart at Lynni var noko utanom det vanlege. Ikkje sjeldan kom ho ridande til byen, og kleda og hattane hennar vekte alltid oppsikt. Interessen for sang og musikk var stor, og ho underheldt stadig familie og venner. Mens ho gikk på ungdomsskulen vart ho med i kristiansundsgruppa Asterix. Nokre av barndomsvenene hennar var Frode Alnæs og Øyvind Elgenes som seinere kom til å etablere gruppa Dance with a Stranger. Ho deltok òg i fleire talentkonkurransar.
Lynni har seinare samarbeidd med mange kjende artistar, som Åge Aleksandersen, Frode Alnæs og Jonas Fjeld. Hausten 1991 kom debutplata hennar ut, Ut i vind, som vart godt motteken. Den neste plata hennar, Tusenfryd, vart ikkje fullt så populær, og det tredje albumet hennar, Storm vart òg noko lunka motteke. Storm er den «mørke» plata hennar — innspela i ei tid da Lynni gjennomgikk depresjonar og skilsmisse. I 2003 kom samle-CDen I manesjen.
