Linda Grubben

Frå Wikipedia – det frie oppslagsverket

Linda Grubben (som ugift Linda Tjørhom) (f. 13. september 1979) i Stavanger) er ein norsk skiskyttar. Ho vaks opp på Tjørhom, i Sirdal kommune. Under VM i skiskyting i 2005 tok Linda Tjørhom bronse på 15 km. Med det norske stafettlaget tok ho sølv under OL 2002 i Salt Lake City, og gull i VM 2004 i Oberhof. Ho har fram til februar 2005 vunne tre enkeltrenn i Verdscupen i skiskyting.

[endre] Bakgrunn

Linda Tjørhom gjekk på Sinnes skule i 9 år, og sykla ofte til skulen. Slik la ho grunnlag for ei idrettskarriere. Ho byrja med skiskyting då ho var kring 12 år gamal, då hadde ho allereie drive med langrenn ein god del år.

Etter grunnskulen flytta ho 3 mil til kommunesenteret Tonstad, for å gå på skigymnaset Sirdal VGS. Det var her ho møtte læraren Roger Grubben, som ho seinare vart sambuar og gifta seg med. Som elev ved Sirdal VGS fekk ho ei god utvikling i sporet, og ikkje minst på standplass der hennar styrke låg. Ho tok eit fjerde år ved skulen for å kunna konsentrera seg meir om skiskyting, og samstundes få gode karakterar. Seinare vann ho gull i junior-VM på stafett, saman med mellom anna Gro-Marit Istad Kristiansen.

Tjørhom har vore på det norske elitelaget frå 2000. Samstundes som ho har satsa på skiskytinga har ho utdanna seg som førskulelærar, ved høgskolen i Sør-Trøndelag. Seinare har skiskyttaren flytta attende til Sirdal, der ho og Roger har bygd seg hus. Roger Grubben er no trenar for herrelandslaget i skiskyting.

[endre] Kortfatta merittliste

(pr. 28. februar 2006)

• Verdscup samanlagt:
  • Beste plassering: 9. plass (2004/05)
• Verdsmeisterskap:
  • 1 gull, 1 bronse (beste individuelle: bronse, 15 km 2005)
• Olympiske leikar:
  • 1 sølv (beste individuelle: 14. plass, fellesstart Torino 2006)
• Verdscuprenn:
  • 3 gull, 3 sølv, 8 bronse