Ernst Haeckel

Frå Wikipedia – det frie oppslagsverket

Haeckel såg på mennesket som siste og beste skotet på utviklingstreet.

Ernst Heinrich Philipp August Haeckel (16. februar 1834–9. august 1919) var ein tysk biolog og filosof som spreidde tankane til Charles Darwin i Tyskland, og vidareutvikla teorien hans om utviklinga av mennesket gjennom evolusjon.

Haeckel var fødd i Potsdam. Han utdanna seg til lege og blei sidan professor i samanliknande anatomi. Han var ein av dei første som såg på psykologien som ein del av fysiologien. Haeckel la fram ei rekke vitskaplege uttrykk som fortsatt er i bruk, til dømes "stamme" og "økologi". Han kalla òg mellom anna politikk for biologi i praksis, og slike utsegner brukte nazistane seinare som del av sin ideologi som grunnlag for rasisme og sosialdarwinisme.

Haeckel var ein karismatisk person som var godt likt av folk flest, men kanskje ikkje så mykje av andre vitskapsmenn. Han var ein dyktig anatom med mange viktige idéar rundt utviklingslæra, sjølv om mange av dei teoretiske utgreiingane hans seinare har vist seg å vera upresise, ufullstendige eller til og med feil.

Ernst Haeckel døydde i Jena i 1919.