Ruumtemperatur

From Wikipedia

As Ruumtemperatur warrt de Temperatur betekent, de man normalerwies in beheizte Rüüm hett.

„Ruumtemperatur“ is een fasten Begreep, man de Temperatur kann dorbi ok von Ruum to Ruum een beten ünnerscheedlich wesen. In Düütschland liggt de je no Norm twüschen 20° un 23°C. In annere Länner kann dat ober ok noch mol anners wesen un schwankt över een Rebeet von 18°C bit 25°C.

De Ruumtemperatur warrt bruukt bi dat Bemeten un Utleggen von technisch Instrumenten un Konstrukschonen. Ok in de Naturwetenschoppen warrt Grötten op Ruumtemperatur betogen, wie t. B. Dampdruck, spezifisch Gewicht, Afloop von chemische Reaktschoonen oder ok de Dicht von Faststoffen un fletigen Stoffen. Wo lang sik Levens- oder Arzneimiddel hallen doot, warrt ok faken vör Ruumtemperatur angeven.

De Ruumtemperatur is tohopensett ut de Lufttemperatur an en Oort un de Strahlentemperaturen von de Flachen in Ümgeven. De Lufttemperatur is dorbi de Temperatur von de ümgeven Luft ahn Inwarken von Strahlenwarms. Meten warrt de Lufttemperatur t. B. an de Arbeitssteed in een Höög von 0,75 m över den Bodden mit en Thermometer dat vör Strohlen afschirmt is.

För Büros warrt en Ruumtemperatur twüschen 21°C un 22°C anraat. Dat schall denn macklig wesen un is goot för de Konzentraschoon. Ober wenn dat buten hitt is, denn sünd ok höögere Ruumtemperaturen tolaten.