Rektaszension

From Wikipedia

Rektaszension (afkörtt as RA; Symbol α) is de astronoomsche Begreep för een vun de twee Koordinaten vun en Punkt op de Hevenskugel in dat äquatoriale Koordinatensysteem. De annere Koordinate is de Deklinatschoon.

De RA is an’n Heven dat wat de geograafsche Längd is. Beid meet se den Winkel vun Westen na Oosten langs den Äquator. Un beid hebbt se en willkürlichen Nullpunkt op den Äquater. För de Längd is dat de Nullmeridian. För de RA is de Nullpunkt de Fröhjohrspunkt, dat is de Oort an den Heven, wonehm de Sünn in’n März över den Hevensäquator rövergeiht, dann wenn Dag un Nacht liek lang sünd.

De RA warrt tomehrst nich in Grad man in Stunnen, Minuten un Sekunnen afmeten. Een Stunn Rektaszension is 15 Bogengrad, een Minuut is 15 Bogenminuten, een Sekunn is 15 Bogensekunnen. De Vördeel dorvun is, dat een dat direktemang bruken kann, wenn een den Heven ankiekt: Stell Di vör, du hest twee Steerns A un B. Beid hebbt de lieke Deklinatschoon un A hett en RA vun 01:30:00 un B en RA vun 05:30:00. Dat is Nacht un de Steern A is opstunns to sehn. Denn steiht de Steern B 4 Stunnen later dor to sehn, wohnehm de Steern A opstunns to finnen is.

[Ännern] Kiek ok bi

• Deklinatschoon